مستريح أسوان: سواق توك توك ينصب على أهل أسوان في 500 مليون جنيه

بدأت القصة في أسوان بسواق توك توك مسجل خطر صعد لقمة المجتمع واتحول لـ “مصطفى البنك”أو “المستريح”، بمعني الشخص اللي أعفي من الشغل والمجهود بفضل أملاكه. وأنتهت القصة بالمستريح يهرب بما قدره 500 مليون جنيه من فلوس وممتلكات أهل أسوان، والشرطة المصرية تطارده ويقع شهداء من قوات الشرطة.

أسوان
عن: elaosboa

في شهر مارس بدأ مصطفى المعروف بأسم مستريح أسوان يعلن في قريته ونجوعها إن اللي يدي له مبلغ معين علشان يشغله معاه في استثماراته هيرده له المبلغ خلال 21 يوم الضعف. وعلشان مصطفى ذكي كان بيستخدم حيلة جديدة، فماكانش بياخد من الناس كاش، كان بيشتري منهم مواشيهم وممتلكاتهم ويطلب منهم يسيبوا فلوس البيعة عنده 21 يوم ويردهم الضعف.

في أول مرة صدق في وعده ورجع للناس فلوسهم مضاعفة بعد 21 يوم، وبدأ يتشهر في أسوان كلها، وبقت الناس تسافر من كل نواحي أسوان علشان يبيعوا له مواشيهم وممتلكاتهم ويسيبوا له الفلوس ويمشوا. مع العلم إن مصطفى البنك اللي عنده 35 سنة كان سبق وقضى عقوبات في السجن بتهمة النصب والاحتيال.

ولكن رغم الماضي فضلت سمعة مصطفى البنك تكبر جدًا لدرجة إن بقى له مندوبين مبيعات بيقنعوا الناس يبيعوا مواشيهم وممتلكاتهم لمصطفى، وكان كل مندوب مبيعات بياخد منه 5 ألاف جنيه مرتب، وعلشان كده كان في ناس كتير بتتسابق علشان تبقى مندوبين مبيعات عنده. بدأت ناس تقلد مصطفى البنك لدرجة إنه كان في 12 بنك أو مستريح تانيين في المنطقة.

حصلت جريمة قتل وكان ضحيتها واحد من الأشخاص اللي بيقلدوا مصطفى البنك، وبدأت الناس تقلق على فلوسها واتاخر المستريح عن سداد فلوس الأهالي، وعدت 45 يوم، وادعى إن المندوبين بتوعه نصبوا عليه في الأرباح، طلب من الناس تدي له يومين علشان يرد أصول الفلوس اللي “استثمرها”، والناس قررت تسنتى، بس ماكانوش يعرفوا إنه بيخطط يهرب خلال اليومين دول بما قدره 500 مليون جنيه.

واتجمع السكان قصاد بيت مصطفى البنك ووصلت قوات الشرطة ومالاقوش حد في البيت. فضلت قوات الشرطة تطارد المتهم لحد ما وصلت لمكان اختباءه في واحدة من المناطق الجبلية في مدينة إدفو في أسوان، وأثناء مطاردة المتهمين الهاربين اتقتل أربعة من قوات الشرطة، هما اللواء عبد النعيم، واللواء أحمد محيي، واتنين من المجندين المرافقين، هما مجند أحمد صديق ومجند أحمد سعودي، واللي استشهدوا أثناء مطاردة واحد من الأشخاص اللي بيمارسوا الاستراتيجية دي من النصب في أسوان.

العقوبة الدستورية لجريمة النصب والإحتيال في مصر تتراوح ما بين سنة أو سنتين وغرامة لا تتجاوز الـ 500 جنية، أما في حالة كان مرتكب الجريمة ذو سلطة على المنطقة اللي مارس فيها النصب والاحتيال بتكون العقوبة 7 سنين.

آخر كلمة: ماتفوتوش قراءة: تقرير صحفي يفضح مشعوذ اغتصب 900 سيدة في تونس

تعليقات
Loading...