هيبان في الأول خبر مضحك، وكتير منكم هيقول ده أنا نفسي ماعنديش تأمين على حياتي، لكنه في الحقيقة حاجة مهمة ومسألة مصيرية في السعودية وفي شبه الجزيرة العربية. الإبل في المنطقة العربية تعتبر ثروة حقيقية، بينفرد بيها العرب عن العالم كله، وعلشان كده في جهود كبيرة طول الوقت للحفاظ عليهم لإنهم ثروة لا تقدر بتمن. بس من الخبر ده، حسينا بفرق واختلاف الثقافات العربية وازاي الناس في كل بلد بيختلف تفكيرها على الموضوع الواحد، واللي بالنسبة لك حاجة مضحكة، بالنسبة لغيرك ثروة وطنية.
قطاع الإبل في السعودية بيتجاوز 50 مليار ريال، وبيزيد بنسبة 10% سنويًا، وده حسب تصريح المدير التنفيذي لنادي الإبل، المهندس بندر القحطاني. والقطاع ده بيمثل دعامة تنموية مهمة في الاقتصاد السعودي، لإنه قطاع حيوي دايمًا وبيشهد طموحات وخطوات جديدة؛ وده لأهمية الإبل في المملكة واعتبارها ثروة وطنية تستحق كل الرعاية والاهتمام للمحافظة عليها.
عن تفاصيل الخبر نفسه، نادي الإبل في المملكة العربية السعودية أعلن عن مشروع التأمين على النقل البري للإبل، وإن الشركة المسئولة عن التأمين هتتولّى عملية التعويض في حالة حدوث أي حوادث على الطرق أثناء رحلة النقل، وده بهدف المحافظة على الإبل في مراحل الانتقال من مكان لمكان، وتقليل المخاطر اللي ممكن يواجههوها والمحافظة على حياة الحيوانات نفسها وعلى أموال أصحابها، لإن الجَمال سعرهم مش قليل.
الجهود التنظيمية والحلول اللي بتتقدم لخدمة أصحاب الإبل في السعودية دايمًا في تطور، من خدمة “وثقها” لحفظ سلالات الإبل، لمنصة “سمِّها” لتوثيق أسماء الإبل، لخدمة “أمّنها” اللي بنشهدها دلوقتي للتأمين على خدمات نقل الإبل.. كل دي مراحل مختلفة وحلول بتتقدم للمحافظة على الثروة الوطنية دي.