غير اللهجة المصري اللي معظم الناس بتعرف تتكلمها، في كلام ومصطلحات ماحدش بيفهمها غير المصري الأصيل اللي عاش واتربى في البلد وعاش في شوارعها أكتر من بيوتها وعارف منين بيودي على فين، وقعد على قهاويها.
هتلاقي إن القاموس المصري له مصطلحاته وتعبيراته اللي بتميزه عن أي لهجة عربية تانية، يعني عندك مثلًا الكلام اللي بيحمل أكتر من معنى ولما بنقوله بنبقى قصدنا المعنى البعيد ومش المعنى الحرفي للكلمة، وده في منه كتير.
- زيّ لما بتروح مصلحة حكومية والموظف يقول لك “فين الشاي؟” هنا بيبقى قصده “الفلوس اللي عايز ياخدها علشان يمشي المصلحة”، ولها معاني تانية منها “الإكرامية”.
قراءة المزيد
- وكلمات تانية زيّ بلح وحمادة وعايش في مياه البطيخ ومعناهم إن الشخص ده مش فاهم حاجة وعايش في دنيا تانية.
- وهتلاقي إن الكوسة بتتقال للتعبير عن الوسايط، طب اشمعنى الكوسة بالذات اللي اختاروها علشان يعبروا بيها عن الوسايط؟ الموضوع له قصة من قديم الأزل قبل ماتنتشر أي وسيلة لحفظ الخضار من التلف، فكانت الكوسة هي أكتر أنواع الخضار اللي بتتلف بسرعة بسبب الشمس والهوا، ووقت لما كانوا بيقفوا المزارعين في طابور علشان يستلموا منتجاتهم، كانوا بيستثنوا صاحب محصول الكوسة من الطابور ده وكانوا بينادوا “كوسة يدخل ومايقفش” ومن هنا اتخلقت العلاقة بين الكوسة والوسايط.
- وكلمة “خد الباب في إيدك” أي حد أجنبي لو قُلت له كده هيفهم إنك هتخلع الباب من مكانه وتاخده وأنت ماشي، بس هي معناها أبسط من كده “اقفل الباب وأنت خارج” زيّها برضه كلمة “اخطف رجلك” ومعناها روح المشوار.
- “انزل من على وداني” بتتقال علشان الشخص يبطل كلام لو كان رغاي.
- “بريزة” مش معناها البريزة العملة المعدنية لإنها اتلغت أصلًا. بس دلوقتي بقى معناها “عشرة جنيه” وبتتقال في معظم الأوقات في القهاوي. و”شاي في الخمسينة” وده الشاي اللي بيتقدم في كوباية صغيرة والمصريين بيحبوه علشان بيبقى مركز.
- “البتاع” والكلمة دي بنقولها على أي حاجة اسمها تاه عن دماغنا أو مش فاكرينها.
- “احنا اللي دهنا الهوا دوكو” ودي بتتقال لما نحب نعظم ونفخر في الحاجات اللي عملناها.
- “خمس دقائق وهكون عندك” ودي المصريين اخترعوا فيها وحدة زمنية جديدة، يعني الخمس دقائق ما يعادل بساعتين بالتوقيت المصري.
قاموس المصريين اتخلق من سنين وبيتجدد مع كل جيل، بس الأكيد إنه خلق جو مميز وحالة مختلفة في كلام المصريين مع بعض وأضاف كمان خفة الدم اللي متعودين عليها في كلامنا وحواراتنا.