ليه الكلام الصعب اللي اتقال لنا من ناس حولينا تأثيره بيفضل عايش معانا؟

شوفنا مؤخرًا صفحة على السوشيال ميديا بتعمل أفلام قصيرة، كل محتواها في الشارع بتصور مع ناس ماشية في الشارع وكل فيلم منهم هو عبارة عن سؤال بيسأله المخرج والناس هي اللي بترد عليه وبياخد ردود أفعالهم التلقائية على الأسئلة زيّ “كان حلمك إيه؟” “إيه أكبر ندم في حياتك؟” “إيه هي السعادة بالنسبة لك؟” “مين هو الشخص اللي نفسك تعتذر له”؟ “إيه هي أحلى كلمة سمعتها” و”إيه هي أصعب كلمة سمعتها”.. وفي الحقيقة أخر فيديو ده هو اللي حبينا نقف عنده، لإن ردود الناس على قد ما هي كانت عفوية بس كانت توجع وتضايق، وخلتنا نسأل ليه ممكن شخص يتعمد إنه يجرح غيره بكلمة! إيه المبرر اللي يخليه يعمل كده وهو عارف تأثيره؟

كم مرة ممكن يكون حد سمع كلمة رجعته مليون خطوة لورا؟ وقللت ثقته في نفسه وأحبطته وحسسته إنه هو عاجز ومالوش لزمة في الحياة! طب في سؤال ساعات بيخطر على بالنا وإن هو الناس اللي بتقول كلمة تجرح حد، بيبقوا عارفين تأثيرها بيبقى سيء قد إيه؟بيبقوا بيفكروا في إيه وهما بيقولوا الكلام ده؟ إيه هو السبب اللي يستاهل إنك تاخد خطوة وتقرر إنك تأذي مشاعر حد؟

في ناس بتقول إن ممكن يبقى الشخص اللي بيحاول يجرح غيره، بتبقى دايمًا المشكلة عنده فبيحب إنه يقلل من اللي حوليه ويحسسهم بالنقص زيّ ما هو حاسس بالظبط، وأحيانًا بيبقى هو نفسه اتعرض للنوع ده من الأذى فبيقرر إنه يحسس الناس كلها نفس الإحساس اللي عاشه واللي اتأذى بسببه، مع إن المفروض إن هو بيبقى أكتر شخص يقدر تأثير ده إيه فبيحاول وبيبقى مركز في كلامه ويفكر قبل ما يقول أي حاجة ممكن تضايق اللي قدامه، وده اللي بيتعمل من الناس السوية نفسيًا واللي لسه مفهوم الإنسانية صاحي عندها.

رغم إن ممكن يكون الكلمة اتقالت من فترة كبيرة، بس ده مش بيمنع تأثيرها النفسي والسلبي على الشخص اللي سمعها، وبيفتكرها كإنها حصلت امبارح. وخصوصًا لو اتقالت من ناس قريبة ومهمة في حياتنا والمفروض يبقوا هما مصدر الدعم لنا، وبيبقوا فاكرين بكده إنهم بيشجعونا علشان تبقى أحسن بس في الحقيقة العكس هو اللي بيحصل إنك بتنكسر وتضعف!

كان في مونولوج مشهور لعبد الرحمن الشرقاوي بيتكلم فيه عن معنى الكلمة وأهميتها، وإننا ماينفعش نقول أي حاجة تيجي على بالنا من غير ما نفكر فيها، لإن شخصيتك وتربيتك بتبان من الكلام اللي بتقوله، ولإن معظم الكلام السيء بيبقى عامل زيّ القبر اللي بيدفن صاحبه جواه.

أَتَعرِفُ معنى الكلمة؟ مفتاح الجنة في كلمة، ودخول النار على كلمة،
الكلمة نور وبعض الكلمات قبور

الحياة مش وردي وسهلة طول الوقت، والمفروض نبقى سند ودعم لبعض علشان نقدر نكملها، مش هنخسر حاجة لو أخدنا وقت صغير من يومنا للناس اللي حولينا نشجعهم فيها ونقول لهم كلمة حلوة ونديهم ثقة في نفسهم، لإنها أكيد هتفرق مش بس معاهم لأ وكمان مع الشخص اللي بيبادر بالكلام الحلو. ونعرف الأجيال اللي جاية إن الطبيعي لإنك تقول كلام حلو تفرح بيه اللي قدامك لإنها جزء مهم من إنسانيات التعامل بين البشر، ومش الطبيعي أبدًا؟إنك تجرح غيرك حتى لو من باب الهزار والتريقة لإنه مايعتبرش أي حاجة تانية غير التفاهة وانعدام الأدب والإنسانية.

أخر كلمة: ماتفوتوش قراءة: هيحصل إيه لو كان عندنا الفرصة إننا نمسح ذكرياتنا السيئة؟