في قعدتنا على القهوة، واحنا بنطلب المشروب الرسمي المعروف، الشاي، ملك القعدة في المجتمع المصري بشكل عام، واحنا بنطلبه في القهوة أيًا كان نوعه بنلاقي القهوجي قاله بمصطلح غريب احنا مش فاهمينه؛ شاي ميزة، كشري، بنورة، بوسطة، خمسينة، كل الطلاسم دي بنسمعها في القهوة واحنا مش فاهمين إيه ده، زيّ بالظبط لما بنروح محلات الكشري ونطلب طبق عادي جدًا لكن بنلاقي اللي بيشتغلوا في المحل بيقولوا مصطلحات غريبة وهما فاهمين بعض وفاهمين الطلبات، تعالوا نحاول نفك الشفرات بتاعة أسامي الشاي اللي بتتقال في القهوة البلدي.
شاي خمسينة
يمكن دي ناس عارفينها عادي مش مصطلح غامض، وشاي الخمسينة ده من أشهر الأنواع في القهاوي، وبيتقدم في كوباية كبيرة لكن بتتملي لحد نصها بس، وبيكون الشاي تقيل.
شاي بنور
شاي بالطريقة العادية، بيتحط تلقيمة الشاي في المياه وبعدها تتصب في الكوبايات الإزاز، علشان كده بيتسمى “بنور”، لكن علميًا هو شبه الشاي المغلي في طريقته علشان بتحط الشاي في المياه لما تغلي وبعد كده تصب في الكوباية، ولازم تبقى كوباية إزاز علشان يتحقق اسمه “بنور”.
شاي ميزة
ودي بتتقال على الشاي بلبن، لكن بتكون فيه نسبة اللبن أكتر من الشاي وبيتوصوا به أكتر، وده شهرته طبعًا مفيش زيّها، خصوصًا الصبح وقت الفطار. لو عايز تعمل نفسك خبير عالمي في القهاوي يبقى وأنت بتتطلب قول للقهوجي شاي ميزة ماتقولش شاي بلبن.
شاي على مياه بيضا
ده بقى طريقته فيها حركة، بيتحط الشاي والسكر في الكوباية، وبعد كده يتصب المياه المغلية على معلقة جوا الكوباية، بحيث تنزل بالتدريج، فبيجيلك الشاي ده لونه شفاف لون المياه، لكن بمجرد ما تبدأ تقلبه لونه هيتغير بالتدريج للأحمر.
شاي على بوسطة
كوباية الشاي العادية اللي بتطلب إنها تجيلك سكر برا علشان تتحكم أنت في مقداره، فبتجيلك شاي من غير سكر، وجانبها سكرية، هو ده بقى الشاي على بوسطة.
شاي صعيدي
أو حبر تقيل زيّ ما بيتقال عليه كمان، طريقة الشاي ده بتكون إننا نحط السكر والشاي والمياه في البراد، ونسيبهم يغلوا، علشان كده بيكون تقيل ولونه غامق.
بعد المقال ده هيبقى قلبك جامد وأنت قاعد على القهوة ومش هتحس إنهم بيتكلموا لغة وأنت قاعد في وسطهم مش فاهم حاجة، أو تحس إنك لا قدر الله فرفور، اقعد واطلب بقلب جامد.