عمرو سلامة ودراما من نوع مختلف.. هل مسلسل بيمبو بيعبر عن الواقع؟
بواسطة: ساره علي
عمرو سلامة مخرج وكاتب مصري رغم إنه اتخرج من كلية تجارة لكن دخل مجال السينما وبقى متميز فيها وده من خلال الأفلام القصيرة زيّ فيلم الشهادة وساعة زمن. وأول فيلم روائي طويل له (زيّ النهارده). ومن بداية أفلام عمرو سلامة، فهو عودنا على رؤية مختلفة وجديدة بتلمس المشاهد وتعبر عنه. عمرو سلامة بياخدنا بالدراما لمستوى تاني خالص. هو مش بس بيقدم سينما جديدة ومختلفة لكن كمان دراما.
وبدايةً من مسلسل ما وراء الطبيعة، بدأنا نلاحظ الفرق ده، المسلسل حقق نجاح كبير أوي بين الجمهور. عمرو سلامة معودنا دايمًا على الاختلاف والجرأة سواء باختيار النص أو الإخراج وكمان الممثلين اللي بنكتشف موهبتهم من خلال أعماله. وحاليًا مسلسل بيمبو من إخراج عمرو، محقق نجاح كبير بين الجمهور بس زيّ ما حقق نجاح كمان كان في جدل عليه. وده بسبب اختياره لقضية المخدرات ومشاكل الشباب كموضوع للمسلسل.
المسلسل من بطولة أحمد مالك وويجز وهدى المفتي. أحمد مالك بيقوم بدور بيمبو الديلر بس هو مش شايف نفسه مجرد ديلر، وبيحاول يكتشف نفسه. ويجز بيقوم بدور جابر الصعيدي الطيب اللي بيتعرف على بيمبو في ظروف غريبة وبشهادة الجمهور، فعمرو بيقدم لنا موهوب جديد في عالم التمثيل خصوصًا إن ده أول عمل تمثيلي. وهدى المفتي بتقوم بدور لانا وبيجتمعوا هما التلاتة علشان يحققوا في قضية قتل وخطف بجانب الأحداث الأساسية اللي بتدور في المسلسل عن قضية المخدرات.
مسلسل بيمبو رؤية فنية جديدة.. هل المسلسل بيعبر عن الواقع؟
مسلسل بيمبو بيقدم فيه عمرو دراما مختلفة كعادتة بدايةّ من صورة وألوان جديدة على المشاهد المصري ده غير الموسيقى التصويرية والأغاني القديمة زيّ “بالحب هتاخدي عيني”، فهي واحدة من الأغاني الموجودة في خلفية المسلسل وبتظهر في أحداث معينة وبتدخلك في الموود المختلف اللي مش هتلاقيه في أي مسلسل تاني.
المسلسل شبابي وفوق الـ 18، كوميديا شبابية وممكن نعتبر إن فيها نوع كمان من الكوميديا السودا والفانتازيا. المسلسل زيّ ما هو محقق نجاح لكن كمان فيه جدل وده بسبب إنه بيناقش قضية المخدرات، الناس شايفة إن المسلسل ممكن يكون بيشجع على ده، بس الحقيقة إن المخدرات موجودة في المجتمع بالفعل وكون إن في عمل فني بيتكلم عن قضية معينة مش معناه إنه بيشجع عليها بالعكس ده بيسلط الضوء علشان نلاقي حل، وعلشان القضية هي المخدرات فأكيد في مشاهد ممكن تكون غريبة على بعض المشاهدين بس في الحقيقة هي بتمثل الواقع المرتبط بالقضية دي.
هل المسلسل بيعبر عن الواقع؟ أه المسلسل فعلًا بيعبر عن قضية موجودة في الواقع ومش في مصر بس، دي قضية عالمية. شخصية بيمبو ممكن يبان للناس إنه ديلر, بس يا ترى هو أكبر من كده زيّ ما بيقول؟ ورا كل شخصية في حكاية شكلت حياتها بالطريقة دي وده اللي بيناقشه عمرو بطريقة غير مباشرة. القضية مش بس مخدرات لكن في قضايا تانية كتير ورا بيمبو الديلر ولانا التايهة وغيرهم من أفراد المسلسل.
عمرو بيقدر يوصل لعقول الشباب من خلال الحرية اللي بيحسوها لما يتفرجوا على أعماله، لإنه بيعبر فعلًا عن واقع ممكن جدًا يكون الشباب بيعيشه بس خايف يتكلم عنه.