بواسطة محمد طارق.
النهارده في تمام الساعة ستة هيدخل النادي الأهلي المصري حقبة جديدة في تاريخه، بعد ما تم الإعلان عن افتتاح ستاد الأهلي الجديد” ستاد السلام سابقًا” بحضور مجلس إدارة النادي الأهلي. نادي القرن قام بالاتفاق مع حد مع شركة استادات القابضة لتغيير اسم ملعب السلام لملعب الأهلي مع حق انتفاع لمدة ٢٥ عامًا.
وبكده يكون أول نادي مصري بيملك ستاد خاص به وهو ستاد السلام لغاية بناء ستاد اخر خاص بالنادي الاهلي. وهيحضر الاحتفالية النهاردة مجلس ادارة النادي الأهلي وعلى رأسهم رئيس النادي كابتن محمود الخطيب.
ومن الافكار اللي هيتم تنفيذها النهارده في الافتتاح هي وجود نسر طائر واللي بيمثل شعار النادي، النسر هيلف الملعب كله ودي الفكرة اللي بيقوم بيها نادي لاتسيو الايطالي وكريستال بالاس الإنجليزي قبل كل مباراة في ملعبهم اذا كان الاوليمبيكو في ايطاليا أو سيلهرست بارك في إنجلترا. ومن المقرر إن ده هيكون حاجة أساسية قبل كل مباراة للنادي على ارضه.
الأهلي في السابق كان بيأجر الملعب زيّ أي نادي في الدوري المصري إذا كان ستاد برج العرب أو القاهرة أو الكلية الحربية سابقًا وستاد السلام قبل حق الانتفاع وبكده، كمان هيوفر فلوس تأجير الاستاد. ولكن دي مش الميزة الوحيدة من وجود ستاد للنادي الأهلي.
ستاد النادي الأهلي هيدخل أرباح كبيرة للنادي ودة من خلال خطة وضعها مجلس ادارة النادي الأهلي. زي التذاكر الموسمية للجماهير مع عودة الجماهير للملعب وحق الانتفاع من الاعلانات في كل أرجاء الملعب ودة هيكون مصدر دخل كبير للنادي.