حلم البطولة على أرض عربية اتحقق وخلص بمكاسب كتير جدًا، قطر نجحت في تنظيم بطولة عالمية بشكل مشرف وبأسلوب متحضر عرفت العالم كله عن التراث والثقافة العربية، طول فترة البطولة ناقشنا حاجات كتير اتحققت، وفي نهائي كأس العالم، شوفنا لقطات مختلفة لمصريين وعرب ثقافتهم ووجودهم كان عالمي، وكانوا سبب إن شعوب العالم كله يعرفوا عننا أكتر، واللي كان عنده فكرة مختلفة متصدرة له عننا، شاف الصورة الحقيقية لنا من غير بذل مجهود في دعايا وغيره.
بِشت “عباية” الشيخ ميسي
اللقطة اللي هتلف العالم لسنين قدام، ميسي بالبِشت أو العباية الخليجي اللي تعتبر إرث تراثي كبير، وهو بيرفع كأس العالم، الصورة اللي هتتخلد في تاريخ كرة القدم هيكون فيها لمسة عربية أصيلة، أي حد يشوفها هيسأل إيه اللي ميسي لابسه، فيعرف أكتر عن الثقافة العربية وتراثها.
لما احنا كمان دوّرنا، لقينا إن “البشت” عبارة عن عباية منتشرة في بلدان الخليج العربي وعدد من دول الشرق الأوسط، بيلبسوها الرجال كرمز للوجاهة في المناسبات المهمة، وبتكون أطرافها معمولة من الدهب، وهي تراث للمنطقة من قرون.
أول مغني مصري في كأس العالم
كان هو “عز العرب” الحقيقي امبارح، ويجز كان أول مغني مصري يؤدي أغنية في ختام كأس العالم بأغنية “عز العرب” من كلماته وألحانه، وغناها بين الشوطين في مباراة النهائي بين فرنسا والأرجنتين.
ظهر ويجز في الفقرة الغنائية بملعب لوسيل وهو بملابس خليجية متمثلة في العباية القطرية، احتفالًا بأول نهائي كأس عالم يقام على أرض عربية، وغنى قدام ملايين من المشاهدين في كل أنحاء العالم، إحساس بالفخر إن شاب من جيلنا بيمثل الموسيقى والفن في أهم وأكبر حدث بيشوفه شعوب العالم.
أغنية “عز العرب” دلوقتي ترند رقم 4 على اليوتيوب، وعملت أكتر من مليون ونص مشاهدة على القناة الرسمية للفيفا.
سوبرانو مصرية للنشيد الوطني الفرنسي
بصمة المصريين في نهائي كأس العالم ماكانتش مع ويجز بس، السوبرانو المصرية فرح الديباني صوتها هز ملعب لوسيل مع انطلاق مباراة الختام، وهي بتغني النشيد الوطني الفرنسي.
مصرية بتغني النشيد الوطني لفرنسا في مباراة النهائي، الجملة نفسها خطفت أنظار العالم كله، وصوت فرح خلّى الناس تهتم تسمع النشيد بحماس في بداية المباراة، وبكل فخر الصوت ده مصري، ودي أول مرة مطرب عربي يغني نشيد لدولة تانية في حدث زي كأس العالم.
دي مش أول مرة فرح الديباني تكون موجودة في حدث مهم وضخم، لإنها أحيت حفل فوز الرئيس الفرنسي ماكرون بالرئاسة للمرة التانية خلال خطاب النصر.
الشطافة
آخر وأهم الإنجازات العربية إن ثقافتنا ابتدت فعلًا تغير العالم، الشعوب الغربية انبهرت باختراع القرن -بالنسبة لهم- اللي لقوه في البلاد العربية، الشطافة هتبتدي تغزو العالم وتخلص أوروبا من الظلام اللي عايشين فيه لحد دلوقتي.
ولو انتشرت فعلًا والمشجعين اللي انبهروا بالاختراع ده رجعوا بلادهم نشروه، هيبقى الفتح العربي للبلاد الغربية لتنضيفها.