شركة مصرية بدأت تصنع أقنعة وقائية بتقنية الطباعة ثلاثية الأبعاد للحد من انتشار عدوى “كوفيد-19”
كتير من أفراد الأطقم الطبية في مصر بيعانوا من عدم وجود أقنعة وقائية كافية، وكتير منهم بيضطر يجيب كمامات على حسابه الشخصي. ومن ساعت ما الفيروس وصل مصر، وكتير من أبناء جيش مصر الأبيض بيقضوا أيام وليالي متواصلة في المستشفيات في محاولة لإنقاذ المصابين اللي وصل عددهم لـ 5 ألاف شخص. وللأسف ده بيعرض حياة كتير منهم للخطر.
د. يحيى دويار في وحدة العناية المركزة بمستشفى الشيخ زايد آل نهيان كان بشكل شخصي خايف بعد ما أكتر من 100 حالة عدت على مكان شغله. باله مارتاحش غير لما لقى عالسوشيال ميديا قناع وقائي معمول من البلاستيك بتقنية الطباعة ثلاثية الأبعاد معمول بأيادي مصرية من شركة “جيزة سيستمز” (Giza Systems). القناع بيحمي الوش كله مش مجرد منطقة الأنف والفم، وعشان السبب ده بالذات د. يحيى دويار كان من أول الناس اللي اشترت المنتج أول ما نزل الشهر اللي فات.
الشركة بتشتغل مع معمل إسمه “مشروع نايتروس” (Project Nitrous) عشان يقدموا منتجات حديثة بالتقنية دي لذوي الإحتياجات الخاصة، بس لمى الفيورس وصل مصر، الشركة قررت إنها تبدأ تشتغل على حلول لمواجهة الأزمة.
القناع الوقائي المُصَنع من شركة “جيزة سيستمز” في الأول بيتصمم بعدين بيتطبع على بلاستيك باستخدام تقنية الطباعة ثلاثية الأبعاد، وبعدين بيتقطع بالليزر عشان يتجمع في علب ويتوزع على ألاف من دكاترة وممرضي مصر.
القناع سهل تجميعه وتعقيمه أسلس بكتير من تعقيم الأقنعة الجراحية أو الكمامات. ده غير إنه منتج ممكن يُستخدم أكتر من مرة، وبالتالي صديق للبيئة عن الحلول التقليدية. الشركة دلوقتي بتوزع حوالي ألفين قناع وقائي على أطقم طبية في 25 مستشفى خاص وحكومي.
د. يحيى وفريقه تم تكريمهم على مجهوداتهم من وزارة الصحة المصرية، وكمان تم اختيار المستشفى بتاعته كواحدة من أكبر عنابر العزل عشان المصابين يتعافوا فيها. على فيسبوك، الدكتور شكر فريقه وشرك التكنولوجيا اللي قدمتها شركة “جيزة سيستمز” على المجهود ضد الفيروس.