الكريسماس واحد من الأعياد اللي بتيجي بأجواء مشحونة بأشكال كتير من البهجة والسعادة لكن الأجواء اللي مليانة سعادة وبهجة دي مش دايمًا بيكون تأثيرها إيجابي على كل الناس. في بعض الناس مننا بتحس بضغط كبير جدًا في الأعياد، الضغط ده بييجي في شكل الإحساس الإجباري بالسعادة.
دايمًا بيقولوا إن الكريسماس هو أسعد وقت في السنة Happiest time of the year، ومن هنا بييجي الضغط إننا نكون سعداء، علشان لو ماحسيناش بالسعادة هنحس بغربة وسط الناس السعيدة اللي حولينا، وهنحس إننا بنضيع فرصة كبيرة. لو ماكناش سعداء في الوقت ده بنسأل نفسنا، أومال هنبقى سعداء امتى لو مش دلوقتي؟ الإحساس ده بالضغط بيسبب قلق وتوتر وحزن وهو ده اكتئاب الأعياد.
إحساس الوحدة والضياع من أسباب اكتئاب الكريسماس
ولإن الأعياد مفهوم مرتبط بالعيلة والتجمعات والأحاسيس الدافية بالانتماء بيضغط على أعصاب ناس مننا ممكن مايكونش عندهم عيلة ومش بيتعزموا على تجمعات بمناسبة الكريسماس، الناس دول بيحسوا بألم الوحدة أكتر من أي وقت تاني في السنة، علشان شايفين كل الناس حوليهم متجمعين ومبسوطين وهما لوحدهم.
ده كمان غير إن الوقت ده هو أخر أيام السنة، وبالتالي بيسيطر عليه إحساس إن في سنة عدت وسنة تانية جاية، وبيحفز السؤال المقلق: أنا عملت إيه السنة دي؟ حققت إيه وضيعت فرص قد إيه؟. الأسئلة دي لوحدها كفيلة بتحفيز القلق والحزن من غير باقي أجواء الأعياد اللي ممكن تسبب اكتئاب.
في ناس مننا بيسيطر عليهم الإحساس إنهم ماحققوش حاجة وإنهم لسه في مكانهم رغم إن سنة كاملة عدت، إحساس العجز وقلة الحيلة ده مرعب
ارتباط فترة الأعياد بامتحانات نص السنة في مصر
معظم طلبة الجامعة في مصر بيمتحنوا امتحانات الميد تيرمات أو امتحانات نص السنة في فترة الكريسماس والسنة الجديدة وعلشان كده بيكونوا في الوقت ده مضغوطين جدًا وقلقانين وبتيجي أجواء الأعياد تزود عليهم الإحساس بالفقد والضغط وده بيسبب اكتئاب.
الإحساس بالفقد والنوستالجيا في الكريسماس
الأعياد بتيجي بذكريات عن أيام فاتت سواء من الطفولة أو أيام أقرب، بس الذكريات دي دايمًا بتبقى أقوي في الأعياد وبنحس إنها كانت أيام أجمل من الحاضر اللي احنا عايشينه فبنفضل نحن للأيام دي ونحس إننا فقدنا وقت كنا فيه سعداء، حتى لو ده ماكانش حقيقي، والنوستالجيا دي واحدة من أهم أسباب الاكتئاب في الأعياد.
القلق من ضياع الإحساس بالدفء
لما تفتكر الناس اللي خسرتها السنة اللي فاتت وتحس بألم لما تلاقي الناس اللي كان نفسك يبقوا معاك وأنت بتحتفل السنة دي مش موجودين، أو إنك تحس إنك ماحققتش أي حاجة من الحاجات اللي كنت ناوي تعملها السنة اللي فاتت، كإنها عدت من غير أي إنجاز حتى ولو صغير.
الإحساس بالخوف والقلق من إن الوقت الجميل اللي أنت عايشه ده ممكن في لحظة يروح منك، وتفكر في الناس اللي ممكن تخسرها أو الحاجات اللي ممكن تضيع منك.
الضعف والفقر والحاجة
الأعياد بتكون أكتر وقت في السنة حزين وكئيب لما تكون فقير وتشوف كل الناس حوليك بتحتفل وبتشتري هدايا وبتخرج لعشا برا مع أهلهم وبيجيبوا شجرة كريسماس وبيلبسوا جديد، بس الفقرا بيشوفوا كل ده بقلب حزين علشان بيعرفوا قد إيه هما مفتقدين حاجات كتير في الحياة ممكن تخليهم سعداء أكتر في حياتهم.