السنة الجديدة خلاص على الأبواب! وفي وقت الأعياد والأجازات دايمًا بنفكر ازاي نقدر نستثمرهم بأحسن طريقة ممكنة، علشان ننهي السنة نهاية سعيدة ونكون مستعدين للسنة الجديدة. والسنة دي بالذات، ماكانتش سهلة أبدًا، بسبب فيروس كورونا وتداعياته اللي أثرت على العالم كله. فلو مش هنقدر نسافر نحتفل في مكان بنحبه، سواء لأسباب متعلقة بكورونا أو لأي ظروف تانية.. إيه تاني ممكن نعمله في أجازة رأس السنة؟
ابدأ هواية جديدة
طول عمرك نفسك تحضر ورش تمثيل، أو حتى درس باليه اللي ماجاتلكش الفرصة (أو كنت مكسل) إنك تحضره؟ مفيش أحلى من إنك تبدأ السنة الجديدة بممارسة هواية كنت عايز تبدأها من زمان!
ابدأ Marathon الأفلام!
لو حاسس بالكسل أو الرغبة إنك تقوم بحاجات بسيطة أو زيّ ما بنقول lowkey الفترة دي، يبقى ممكن تعمل قائمة بالأفلام والمسلسلات اللي أنت بقالك فترة عايز تتفرج عليهم، واعمل جدول بحيث إنك كل يوم تشوف أكتر من حاجة خلال الأجازة!
اتعلم ازاي تعمل حلويات جديدة
الطريقة اللي أهلنا كانوا بيعرفوا بيها وصفات لأكل جديد، زيّ إنهم يتفرجوا على الشيف شربيني ويكتبوا وراه، ممكن تكون شايفها تقليدية.. ولكن الحقيقة إنها كانت بتعرفنا على وجبات كتبر بنحبها وبناكلها لحد دلوقتي! وبمناسبة marathon الأفلام اللي كنا بنتكلم عليه من شوية، ليه ماتتعلمش طرق جديدة لعمل حلويات أو cookies للكريسماس؟ الإنترنت هو الشيف شربيني بتاع الجيل ده، وعنده كل الوصفات!
اعمل Sleepover مع صحابك
الأعياد في الأساس هو وقت المفروض بتقضيه مع أهلك والناس اللي بتحبهم. فلو مش هتقدروا تسافروا ممكن تتجمعوا عند بيت حد منكم وتباتوا مع بعض. ممكن تطبخوا سوا، تلعبوا كوتشينة، تتفرجوا على فيلم، أو حتى تقعدوا على الروف تشربوا شاي وتتفرجوا على النجوم. صدقنا.. هتبقى أحلى من ألف سفرية!
غير من ديكورات أوضة النوم
من الحاجات اللي بتبان بسيطة اللي ممكن تعمل فرق كبير وتدي طاقة إيجابية للشخص، هو إنه يعيد ديكورات المكان اللي هو قاعد فيه. فممكن تغير شوية من ترتيب الأثاث في الأوضة، وتجيب شوية زينة احتفالية تحسسك بموود الكريسماس والسنة الجديدة. مش لازم تكون الحاجات غالية أو كتير، فمهما كانت بسيطة هتضييف موود لأوضتك الجديدة في رأس السنة!
اعمل خير
علشان تحس بالسعادة، لازم تديها لغيرك. كل الناس دلوقتي بتفكر ازاي تبسط نفسها، وممكن كمان تكون بتنتظر هدية أو خروجة حلوة مع صديق أو شريك للحياة. بس في ناس ماعندهمش الـ option ده. في ناس مشردين وعائلات فقيرة كل أحلامهم في الوقت ده إنهم يقدروا يتدفوا من البرد ويبقى عندهم قوت يومهم. في ناس كتير بتتبرع بتساعد بالفلوس، ولكن ممكن نساعد بطرق مختلفة زيّ التبرع بالأكل أو الدفايات أو البطاطين أو اللبس.
دلع نفسك
وأخيرًا، لازم نرجع تاني لنقطة إنك تدلع نفسك. المصطلح ده له معاني مختلفة حسب طبيعة كل شخص والحاجات اللي بتسعده. في اللي بالنسبه له الدلع يعني يروح spa يعمل مساج وينزل في جاكوزي. وفي اللي بالنسبه له يعني ياكل أكله حلوة، يقرأ كتاب جديد، أو حتى إنه يروح الجيم.. أيًا ما كانت الحاجة اللي بتبسطك.. اوعى تتردد إنك تعملها!