مين بهججة اللي شوفناهم في إكسبو 2020 دبي؟
بواسطة: ساره علي
بهججة باند مصري, ومن اسمه هتعرف إنه بيعبر عن البهجة. هما خمس بنات قادرين يخطفوا كل الأنظار بمجرد ظهورهم على المسرح.
استغلوا حبهم للغنا والتمثيل بتقديمهم لمونولوجات مضحكة وساخرة من الواقع, وكمان قدروا يوصلوا رسايل معينة للمجتمع عن طريق المونولوجات.
أسماء روح قلبي مش هنشوفك عروسة, لا يا طنط دوسة مش عاوزاكي تشوفيني, عاوزة تحسي بيا شوية وترحميني.
مونولوج طنط دوسة من أشهر مونولوجات الفرقة من كتابة مؤسس وملحن الفرقة (أيمن حلمي) وغناء أسماء أبو اليزيد اللي بتوجه فيه رسالة لطنط دوسة:
عايزة حليوة جان, حضنه يبقى الأمان.
الفرقة بتتكون من خمس بنات (سمر جلال ووئام عصام وأسماء أبو اليزيد ورغدة جلال وشروق الشريف).
الفرقة كانت متحمسة جداً لمشاركتها في إكسبو دبي 2020, وعبروا عن ده على صفحتهم على الفيس بوك (متحمسين جدًا نعلن عن حفلتنا الجاية, أول حفلات بهججة برا مصر, مين قال جاي دبي؟).
كمان عبروا عن سعادتهم لمشاركتهم بواحدة من أغاني بهججة مع المغنية الصربية Aleksandra Krstic.
المونولوج فن موجود من زمان ومتعودين إن المونولوجست بيكون صوت رجالي, فرقة بهججة غيرت الفكرة بظهور خمس بنات مليانيين حياة وحب للمسرح والغناء.
المونولوجست موهبة مش موجودة كتير، بتجمع بين الغنا والتمثيل وبتحتاج من الفنان سرعة بديهة لإنه بيتفاعل مع الجمهور بشكل مباشر, وكل ده موجود في الخمس بنات بروحهم الحلوة اللي بتوصل للجمهور, وكمان بيشارك معاهم.
الأغاني مكتوبة مخصوص لبهججة, علشان تقدر تتماشى مع المجتمع, فالفرقة مش بس بتقدم المونولوج للفكاهة والضحك, لا كمان بتناقش قضايا في المجتمع, ومشاكل الحياة بطريقة غير مباشرة, وبشكل كوميدي هتقدر تتقبل مشاكلك اليومية وكمان تضحك عليها.
كله هيبقى تمام 2063
هنشقق البطيخة ونحقق الأحلام
هيضرب البركان 2063
وهنتقلب للقمة وهنعدلك يا زمان
قالك إيه كمان؟ وإيه كمان؟ باني يا حاجات. عليكي الأمان!
أغنية فرحة 2063 أول كليب لبهججة.