واحنا بنختم السنة الجديدة حبينا نجمع لكم حاجات إيجابية حصلت معانا السنة اللي فاتت، واللي كان من ضمنها مجموعة من الاحتفالات المهمة اللي حصلت في مصر، وكل ردود الأفعال كانت إيجابية على مستوى البلد أو على مستوى العالم، وكلها احتفالات أظهرت مصر بالشكل اللي تستحقه فعلًا.
موكب نقل المومياوات
كان احتفال ضخم ومشرف على كل المستويات، اتنقل فيه 22 موميا لملوك وملكات مصريين، 18 ملك، و4 ملكات، منهم مومياوات الملك رمسيس التاني، وسقنن رع والملكة حتشبسوت، وغطى الاحتفال ده أكتر من 400 قناة عالمية. الموسيقى والأغاني والأفلام التسجيلية والعازفين والمايسترو والناس اللي غنت واللي قدموا العرض والأزياء الفرعونية والإضاءات اللي كانت موجودة في التحرير لحد المتحف القومي للحضارة، كلها كانت عاملة مزيج وصل لنا في الأخر الصورة اللي كانت لازم تظهر بها مصر قدام العالم كله.
طريق الكباش
من الاحتفالات المهمة اللي اتعملت برضه بعد نقل المومياوات، وكان على نفس المستوى من العظمة والإبهار، شارك فيه مجموعة من الفنانين منهم محمد حماقي ولارا اسكندر، واتغنى فيه أشهر أغنية متعلقة في أذهاننا بالأقصر “الأقصر بلدنا بلد سواح”، وبجانب ده اتعمل عرض مسرحي مستوحاة من عيد الأوبت، وفيلم قصير عن أهم الأماكن الأثرية في الأقصر وعن الأنشطة اللي ممكن تتعمل غير زيارة الأماكن الأثرية، طريق الكباش يعتبر من أهم الطرق والعناصر الأثرية الموجودة في مدينة طيبة واللي افتتاحه يعتبر إنعاشة جديدة للسياحة في الأقصر، وده فعلًا اللي حصل بعد الافتتاح، وكان لأول مرة من 10 سنين يبقى كل الفنادق كاملة العدد!
قادرون باختلاف
الاحتفالية قدمها نجوم كتير زيّ دنيا سمير غانم اللي غنت أغنية بلغة الإشارة وأشرف عبد الباقي اللي عمل حوار تفاعلي مع مجموعة من أصحاب الهمم وكان لقاء عفوي، وقدموا أكتر من فقرة غنائية سواء فنانين غنوها أو أصحاب الهمم قدموها، ويوسف الشريف اللي قدم فقرة بعنوان رسالة الفن وإن لازم يبقى في وصف صوتي لكل الأعمال الفنية، الاحتفالية دي حرص الرئيس السيسي إنه يعملها كل سنة، بنحتفل فيها بمجموعة من أصحاب الهمم في مصر، في فرصة إنهم يعرضوا مواهبهم ونبين قد إيه بقى في دعم وتمكين غير مسبوق لأصحاب الهمم في مصر.
معرض إيديكس
من ضمن الأحداث المهمة اللي حصلت قريب هي افتتاح المعرض الدولي للصناعات العسكرية والدفاعية “إيديكس”. واللي يعتبر أكبر تجمع دولي في مجال الصناعات العسكرية بيتعمل على أرض مصر، المعرض كان فيه أكتر من 400 عارض من كل دول العالم علشان يعرضوا أحدث التقنيات في مجالات الدفاع والتسليح من 42 دولة وكان بحضور وفود رسمية من كبار الشخصيات من 45 دولة وأكتر من 30 ألف زائر للمعرض، وأكتر من 40 وزير دفاع وإنتاج حربي وقائد عسكري من القادة العسكريين حول العالم.
معرض الأبد هو الآن
معرض فني عالمي احتضنته الأهرامات، بيقوم فيه الفنانين بعرض أعمالهم في وسط الصحرا، المعرض من تنظيم “آرت دي إيجيبت” وهي شركة بتهدف لترويج الفن المصري القديم وخاصة تراث الفراعنة ،من خلال تنظيم معارض في المواقع التاريخية اللي تذخر بها مصر. وحضره عدد من الفنانين والمشاهير العالميين، زيّ المغني فاريل ويليامز، وألكسندر بونوماريف من روسيا، وجيزيلا كولون (بورتوريكو)، وجواو تريفيسيان من البرازيل، وشوستر وموسلي من المملكة المتحدة، وستيفن كوكس آر إيه من المملكة المتحدة، وقالت مؤسسة فنون مصر” آرت دي إيجيبت”، نادين عبد الغفار، إنها “المرة الأولى في تاريخ هضبة الجيزة الممتد على مدار 4500 عام، اللي تم فيها دعوة فنانين معاصرين من جميع أنحاء العالم لعرض أعمالهم مع الخلفية الأثرية لأهرامات الجيزة.