الأجواء القاهرية على أصلها، بكل الحاجات اللي مش هتلاقيها في مكان تاني غير خان الخليلي، لكن تعرف ليه اتسمى بالاسم ده؟ سبب تسمية الخان بترجع للسلطان جاهركس الخليلي، ده كان واحد من سلاطين دولة المماليك البحرية سنة 1382، والخان ده كان من ضمن 30 سوق تانيين، كان هو أشهرهم على مر الزمن في المنطقة دي، فتعالوا نشوف إيه الحاجات اللي ممكن تعملها هناك وماينفعش تفوتها؟
المصنوعات
ماينفعش تروح خان الخليلي من غير ما تشوف الصناعات اليدوية التقليدية اللي بتتعرض هناك بطابع تراثي، من سجاد وسبح وتماثيل فرعونية، لشكمجيات وذهب وفضة، والبخور بكل أنواعه والعطور، حتى الأواني النحاسية، وكتير من الحرف اليدوية اللي بيتميز بيها المكان، واللي لازم السياح يشتروا منها هدايا ياخدوها معاهم وهما راجعين بلادهم، ومن أكتر الحاجات اللي بيتميز بيها عن غيره.
هدوم فلكلورية
من البرقع للطربوش والملاية اللف لبِدل الرقص الشرقي، مش هتلاقي مكان تشتري منه الهدوم الفلكلورية دي أحسن وأرخص من خان الخليلي، يمكن تكون مش هتلاقي في مكان غيره في القاهرة أصلًا.
إكسسوارات نحاس
من أحسن الأماكن اللي هتلاقي فيها إكسسوارات نحاسية بسعر قليل جدًا وخامة كويسة مش بتصدي، وأشكال مصرية وفرعونية مختلفة.
آلات موسيقية
أكتر الحاجات اللي بتجذب السياح هناك، لو عايز تشتري آلات موسيقية، لازم تروح خان الخليلي، هتلاقي الآلات هناك بجودة عالية وأسعار معقولة مش غالية أوي.
ديكورات
عن: elmstba 
عن: البوابة
لو عايز تشتري ديكورات لبيتك يبقى شكلها مختلف، لازم تزور خان الخليلي وتاخد لفة في المحلات هناك وتشوف الأنتيكات والديكورات اللي هتغير شكل بيتك خالص.
قهوة الفيشاوي
وطبعًا، ماينفعش تكون في خان الخليلي وماتقعدش على قهوة الفيشاوي، اللي تعتبر من القهاوي التاريخية بترجع لسنة 1769، لو هتروح بننصحك تطلب شاي، علشان هيتقدملك في براد معدن صغير طالع منه رائحة النعناع، على ترابيزة صغيرة، هتكمل الجو اللي هتحس بيه في المكان.
جولة بين الآثار الإسلامية
من أكتر الحاجات اللي في الأصل بيتميز بيها المكان، طابع الآثار الإسلامية للقاهرة الفاطمية، لو عايز تتفرج على شواهد على الزمن ده وعلى الحضارة الفاطمية في مصر، بننصحك تاخد جولة بين الآثار في خان الخليلي.
فطاطري الحسين
لو انت هناك لازم تعدي تدوق فطير مصري أصيل بأنواع مختلفة من فطاطري الحسين، حلو أو حادق، أكيد هتلاقي أكلك المفضل في منيو فطاطري الحسين.
اتصور
من أحلى الأماكن اللي تقدر تاخد فيها صور ماتتنسيش، ومكان هيريح عينيك بطريقة ماتتوصفش، لازم لما تروح تاخد معاك صاحبك اللي بيعرف يصورك مش الرهوان التاني، وتحتفظ بالذكرى دي.
كبابجي الدهان
لو عامل دايت ومش هينفعك فطير من فطاطري الحسين، فليها حل ماتخافش، كبابجي الدهان اللي من أقدم المطاعم في القاهرة وفي خان الخليلي، لو لسه ماجربتوش فانت فايتك كتير ولازم تجربه، وكمان سهل جدًا توصله هو قدام مسجد الحسين.