جولتنا في قمة رايز أب: ليه الناس مهتمين يحضروها السنة دي

للسنة العاشرة، قمة رايز أب بتقدم لرواد الأعمال والمستثمرين أهم حاجة ممكن يحتاجوها في شغلهم، إنها توصلهم ببعض.

روحنا رايز أب وسألنا الناس إيه اللي جذبهم لحضور القمة، ومتوقعين إيه منها السنة دي؟

قابلنا أفنان، عندها فكرة مشروع تصنيع شوكولاتات وحلويات صحية، لما سألناها جاية رايز أب ليه، قالت لنا: “هنا في تجارب كتير لشركات لسه بادءة، عايزة أتعلم منها، وجاية أقابل شركائي في مشروعي الجديد”.

واتكلمنا مع إسلام هلال، طالب في كلية هندسة، قال لنا: “ماجاتش فرصة آجي السنة اللي فاتت، وسمعت إنه كان معدي توقعات الناس بشكل كبير جدًا، وعارف إن السنة دي هيكون في ناس ممتازين جدًا” ده غير إنه حابب يقابل طلبة من كليات هندسة في جامعات مصر المختلفة.

كريم محمد، طالب عنده موقع تجارة إلكترونية، جيه رايز أب علشان يتعرف على ناس جديدة، والأهم إنه يسمع المناقشات المهمة في مجاله.

أيمن عبده، عنده شركة ناشئة في مجال التسويق الإلكتروني، اللي شجعه ييجي قمة رايز أب إنه يشوف الشركات الناشئة اللي موجودة إيه اللي بيميزها، وإيه اللي خلى الناس تهتم بها وتتطور علشان تكون في قمة رايز أب، وقال كمان: “في قصص نجاح ملهمة جدًا هنا، حابب أعرف هما نجحوا ازاي”.

أيمن قال لنا كمان إنه قابل مستثمرين مهتمين بشغله وهيتواصلوا مع بعض قريب.

أما منة، طالبة في كلية هندسة، فقالت لنا إن اللي خلاها تيجي السنة دي هو مكان القمة! كان نفسها تدخل المتحف المصري الكبير وتشوف ازاي بيتعمل فيه معارض ضخمة زي دي.

رايز أب هو أكبر معرض لريادة الأعمال في الشرق الأوسط، بيشارك فيه أكتر من 150 شركة ناشئة، وأكتر من 250 متحدث من العالم كله، بيتجمعوا كلهم السنة دي مع آلاف المشاركين، في المتحف المصري الكبير، من يوم 16 لـ 18 مارس.

آخر كلمة: ماتفوتوش قراءة: دكيلو: ازاي تعلن عن شركتك أو تعبر عن نفسك من شنطتك؟

تعليقات
Loading...