دكيلو: ازاي تعلن عن شركتك أو تعبر عن نفسك من خلال شنطتك؟


في قمة رايز أب، وسط مشاريع كتير وأفكار مختلفة بيقدموها الشباب في شركات ناشئة، لفت نظرنا شنطة عليها شاشة وبيتعرض عليها صور مختلفة، حبينا نعرف إيه حكاية الشنطة واتكلمنا مع (دكيلو – dkilo) علشان نعرف مين هما وبيقدموا إيه.


نهى ياسر، مديرة التسويق والمسؤولة الإعلامية في دكيلو، قالت لنا: “احنا شركة دعايا بتعمل حلول جديدة وذكية الناس تقدر تستخدمها في التسويق والدعايا لنفسهم أو لشركاتهم وشغلهم، الحلول الذكية بنتعمد إنها كمان تكون سهلة الاستخدام وتخليك توصل لأماكن ماكنتش تتخيل إنك تسوق لنفسك فيها وبمنتهى السهولة، مش محتاج تجيب شاشة وتعلقها في مكان أو تأجر مكان تعلن فيه، احنا عملنا الحل في شنطة تقدر تستخدمها في يومك العادي، وفي نفس الوقت الشنطة فيها شاشة ممكن تعرض عليها الإعلان اللي أنت عايزه”.

وكملت: “لو عايز تعلن عن شركتك وتحط اللوجو بتاعها، أو حتى عايز تعبر عن نفسك وشخصيتك لو مثلًا أنت بتحب السفر وهتحط صور لبلاد أنت سافرتها، وتفتح فرصة للمناقشة في أي مكان تكون فيه عن طريق الشنطة، من غير ما تعمل مجهود في إنك تعبر عن نفسك”.

أما عن اسم الشركة، نهى حكت لنا قصته: “هي الكلمة تعتبر جت لنا من (digital kilometers) واختصرناها في (dkilo)”.

فكرة إنك تعبر عن نفسك وشخصيتك من لبس أو شنطة أو إكسسوارات بتلبسها، الناس بتحب تعملها دايمًا وبتحس إنها جزء منها، مش مجرد قطعة اشتريتها وبتلبسها وخلاص، وبنشوف الفكرة دي بقالنا سنين، وتقدر حتى تطبع أي تصميم أنت عايزه على تيشيرت أو شنطة، لكن إنك تستغل ده في الدعايا وبشكل تكنولوجي جديد، دي اللي تعتبر فكرة جديدة.

آخر كلمة: ماتفوتوش قراءة: النسخة العاشرة لقمة رايز أب: لقاء ريادة الأعمال بأقدم حضارة بشرية

تعليقات
Loading...