الدكتور “توفيق بن فوزان الربيعة” وزير الحج والعمرة السعودي، في أول زيارة له لمصر، أعلن عن تقديم كل التسهيلات الممكنة للمعتمرين والحجاج المصريين، وبحث مع وزير الداخلية ووزير الأوقاف ومفتي الديار المصرية تقديم تسهيلات منح تأشيرة العمرة للمصريين، وده بحضور السفير السعودي في القاهرة “أسامة بن أحمد نقلي”، ونتج عن الاجتماع ده تصريحات مهمة للحجاج والمعتمرين المصريين، تم إعلانها في مؤتمر صحفي في السفارة السعودية بالقاهرة.
أول الإجراءات اللي هتتاخد لتسهيل الحج والعمرة للمصريين هو إلغاء كل القيود الصحية والإجراءات اللي كانت متبعة في أثناء جائحة كورونا لكل المعتمرين من كل مكان في العالم، ده غير إلغاء الشروط المفروضة على سفر المرأة لأداء مناسك الحج والعمرة، بما فيهم شرط “الصحبة الحسنة”، ومد تأشيرة الحج والعمرة من شهر لـ 3 شهور.
أما عن منصة “نسك” فهي هتسهل قدوم المعتمرين والزوار لمكة والمدينة بأنواع مختلفة من التأشيرات، علشان يأدوا مناسكهم.
ووضح الربيعة إن الراغب في العمرة من مصر في إمكانه عمل مناسك العمرة كاملة بمبلغ يوصل لـ 4400 جنيه رسوم، من خلال التسجيل والحجز عن طريق منصة نسك، شاملة السكن والإقامة، وممكن إصدار التأشيرة في أقل من 24 ساعة، ده غير إن المنصة بتسهل كل احتياجات السفر للعمرة، من حجز السكن والتنقلات لحد زيارة الروضة الشريفة.
من ضمن التسهيلات كمان، إن أي زائر للسعودية يقدر يعمل عمرة بأي تأشيرة، مش شرط تأشيرة خاصة بالعمرة، كمان مافيش حد أقصى لعدد تأشيرات العمرة، ده غير إن الممكلة بترحب بالمعتمرين المصريين من غير سقف لعدد المعتمرين، ومن غير قيود صحية، وبأقل التكاليف.
في خلال الاجتماع، تم إلقاء الضوء كمان على التطورات اللي تمت في الحرمين بتكلفة 200 مليار ريال، وتطوير مطار الملك عبدالعزيز، وإنشاء القطار السريع بين مكة والمدينة، وتطوير المشاعر المقدسة في منى وعرفات بالشراكة مع كل جهات المملكة.
ده غير التحول الرقمي اللي بتشهده المملكة في الفترة دي، واللي بيقدم الحصول على تأشيرة العمرة من خلال 10 مواقع في خلال 24 ساعة من غير قيود.