ازاي اللي بيحصل في أوكرانيا دلوقتي بيغير حياتنا؟

مع مرور شهور على بداية الحرب الروسية الأوكرانية وتطور الأحداث بشكل يومي، اتحولت الحرب دي إلى ما يتم تعريفه بأكبر حرب أوروبية من سنة 1945. الحرب دي لها تأثير هائل على العالم وشكله، ومستقبل سياسته الدولية، واقتصاده؛ وبالتالي على الشرق الأوسط.

هجوم جسر القرم

حرب من غير قواعد.. إيه اللي بيحصل دلوقتي؟

دخلت الحرب في أوكرانيا منعطف خطير، بعد حادث التفجير على الجسر اللي بيربط الأراضي الروسية بشبه جزيرة “القرم”، ووجهت مصادر روسية الاتهام لكييف. أمر بعدها الرئيس “فلاديمير بوتين” بتشكيل لجنة حكومية للتحقيق، ووصف بعض البرلمانيين التطور بإنه هيفتح الباب قدام حرب بلا قواعد. الرد من روسيا كان عنيف وحاسم، ونفذت موسكو حملة قصف اتعرضت له عدة مدن أوكرانية، وقال بوتين في كلمة إن روسيا كانت لازم ترد على انفجار القرم.

وكدليل على وتراجع روسيا من ناحية، وتعقد الموقف من ناحية تانية، قال مسؤول في المخابرات البريطانية إن أوكرانيا قدرت تتقدم على القوات الروسية، اللي وصفها بإنها “منهكة”. “جيريمي فليمينج” رئيس هيئة الاتصالات الحكومية البريطانية قال إن ذخيرة موسكو قربت تخلص، ودايرة صنع القرار المقربة من الرئيس الروسي فلاديمير بوتين “معيبة”، وده ممكن يكون ضمن الحرب النفسية والحرب العملية اللي بيخوضها الغرب بالوكالة على روسيا في أوكرانيا.

من ناحية تانية، صوتت الجمعية العامة للأمم المتحدة برفض طلب روسيا إجراء اقتراع سري في الجمعية، اللي بتضم 193 عضو، حوالين تحرك موسكو لضم أربع مناطق محتلة جزئيًا في أوكرانيا.

تفجير جسر القرم
الهجمات الروسية علي المدن الأوكرانية للرد علي تفجير الجسر

تأثيرات ده على دولنا وعلى حياتنا في الشرق الأوسط

الشرق الأوسط مش هيبقى استثناء من الاضطرابات الناجمة عن الصراع ده في أوروبا، وده هيكون واضح في نقص الغذاء والتضخم، اللي ممكن يؤدي لاضطرابات سياسية وسط الصراع المستمر بين الغرب وروسيا.

الحرب أثبتت إن النظام الدولي مابقاش أحادي القطب والولايات المتحدة على رأسه، كمان شككت الحرب في استمرارية تفوق الدولار الأمريكي في الاقتصاد العالمي، وده كله له تأثير على دولنا؛ أولًا تأثير سياسي هيغير شكل التحالفات الدولية، ثانيًا تأثير اقتصادي بشكل كبير.

التأثير والاضطرابات واضح بشكل كبير في شحن الحبوب، وكان الشرق الأوسط من بين الأكثر تضررًا بالأزمة دي، وده اتسبب في نقص في الغذاء وغلاء كبير في أسعاره، وده بيؤدي إلى زيادة نسب الفقر، وبالتالي ممكن يؤدي إلى زيادة احتمالات الاضطرابات السياسية والاجتماعية، زيّ ما أشرنا قبل كده.

شوارع العاصمة تونس، على سبيل المثال، بتعيش من أيام أزمة صفوف طويلة من العربيات اللي مستنية دورها علشان البنزين، وبتنفي وزيرة الطاقة التونسية “نايلة نويرة” إن يكون النقص في الوقود ناتج عن عدم قدرة الحكومة على دفع مستحقات الواردات، وبتقول “نايلة” إن السبب في ده هو إن كتير من المستهلكين وأصحاب المركبات بياخدوا أكتر من احتياجاتهم من البنزين، وفي الحالتين، السبب هو الأزمة اللي بنعيشها بسبب الحرب الروسية الأوكرانية.

وفي مصر، أظهرت بيانات الجهاز المركزي للتعبئة العامة والإحصاء، إن التضخم السنوي لأسعار المستهلكين في المدن المصرية سجل أعلى مستوياته من أربع سنين، وزاد التضخم السنوي لأسعار المستهلكين لـ 15% في سبتمبر، مقابل 14.6% في أغسطس.

الخليج برا الكلام ده بسبب النفط

وسط الاقتصاد العالمي، يُعتبر الخليج هو المنطقة الوحيدة اللي برا الوضع ده، المملكة العربية السعودية دلوقتي بتتجه إنها تبقى أكبر اقتصاد في العالم العربي، وهتحقق أعلى معدل نمو اقتصادي بين دول مجموعة العشرين في 2022 بواقع 7.6٪. ونفس النظرة الإيجابية دي ممكن تطبيقها على باقي دول الخليج العربي المستفيدة من ارتفاع أسعار النفط، بحسب التقرير الصادر عن صندوق النقد الدولي. 

تكلفة أزمة أوكرانيا على الاقتصاد العالمي

بحسب تقرير لسكاي نيوز، تكلفة تأثير الحرب في أوكرانيا على الاقتصاد العالمي تُقدر بحوالي 2.8 تريليون دولار بنهاية السنة الجاية، الرقم ده هيكون أكبر بسبب الشتاء وارتفاع أسعار الطاقة، وده معناه زيادة انفاق في ميزانيات الأسر والأعمال التجارية.

وانفقت الحكومات في أوروبا مليارات اليوروهات لمساعدة الأسر والشركات على مواجهة الارتفاع المفاجئ في تكاليف الطاقة، وده جيه على شكل مساعدات، إلا إن الموضوع ده فيه انتقادات، لإنها بتتوجه بشكل غير عادل، والأسر الأكتر ضعفًا مش بتستفيد، في الوقت اللي بيدفعوا فيه مبالغ طائلة على الفواتير، وده ممكن يؤدي لاضطرابات.

آخر كلمة: ماتفوتوش قراءة: الأزمة الاقتصادية الحالية هي الأسوأ من الحرب العالمية التانية

تعليقات
Loading...