تخيل لو شخصيات مسلسلات رمضان كانت كحك.. مين هيبقى إيه؟
تخيلوا لو صنفنا شخصيات مسلسلات رمضان اللي حبيناها واتعلقنا بيها في ليستة حلويات العيد، كحك وبسكوت وبتي فور، مين من الشخصيات، حسب اللي قدموه وحسب طبيعة كل شخصية في المسلسل، يليق عليه حاجة من حلويات العيد اللي بنحبها؟
غُريبة: ليلى
الهادية الشيك الناعمة، الغُريبة تُعتبر أشيك الحلويات في العيد، وشخصية ليلى في “سوتس بالعربي” شبه الغُريبة فعلًا، شكلًا وموضوعًا.
بسكوت: فريدة هانم
شخصية فريدة هانم في مسلسل “أحلام سعيدة” ، الهانم اللي عايشة في الزمالك طول عمرها ومتعودة تروح مزادات تشتري أنتيكات، وبتحب كل حاجة في مكانها المظبوط بالمللي كمان، الهانم الشيك الرقيقة هي فعلًا شبه البسكوتة، لكنها من أقل حاجة بتتكسر، وفريدة فعلًا بتتعرض لصدمات كبيرة في المسلسل.
بتي فور: طارق أبو الهنا
البتي فور هو الكاريزما في وسط حلويات العيد، بيفرض سيطرته وكاريزمته من غير مجهود، وده اللي بيعمله طارق أبو الهنا في مسلسل “راجعين يا هوى” ، والبنات كلها بتتكلم عن الكاريزما المتوارثة في عيلة النبوي السنة دي.
كحك بالملبن: فاتن أمل حربي
تونة من برا قوية وبتجري ورا حقوقها وبتواجه مشاكلها، لكن من جواها طيبة وحنينة مع بناتها حتى في أوحش الظروف، وده بالظبط الكحك بالملبن.
سابليه: مربوحة
بالتنوع اللي بنشوفه من مربوحة بالأطقم المميزة بتاعتها أو “الطجومة” بتاعتها زي ما هي بتقول، السابليه كمان بيتعمل بأكتر من شكل وحشوات مختلفة، بتفكرنا بالاختلاف اللي بتعمله مربوحة في كل حلقة.
كحك بالمكسرات: جلجل
كحك بالمكسرات ودلع، حاجة كده خفيفة، زي جلجل في “مكتوب عليا” ، شخصية خفيفة ضحكتنا بخفة وتسلية طول رمضان.
معمول: هدرس
حاجة كده بتحاول تبقى من حلويات العيد بس مش واخد حقه وسطهم، بيحاول يبقى موجود طول السنة بس برضه ماحدش مديله اهتمام، بيفكرنا بهدرس بالظبط، بيتشقلب علشان يعمل لنفسه شخصية بس ماحدش مديله أهمية، بس ماننكرش برضه إننا بنحبه ولما بنجرب نديله فرصة بنكتشف إنه خفيف.
كحك بالسكر: الكبير
مهما روحنا وجينا، الكحك السادة بالسكر هو الأصل، زي الكبير بالظبط، مهما كترت شخصيات المسلسل هو على وضعه، قادر يحافظ على مكانته مهما اختلفت الظروف.