من كتر حبنا في النوستالجيا عايزين ندخلها في كل حاجة في حياتنا، ولإننا مهوسين بنجوم وممثلين زمان تخيلنا وسألنا نفسنا لو كانوا موجودين دلوقتي معانا في رمضان، كانوا هيمثلوا في مسلسلات إيه وكان إيه أكتر دور هيليق عليهم؟
رشدي أباظة – راجعين يا هوى
خالد النبوي طالع شخصية الدنجوان اللي كل البنات بتحبه وبتقع في غرامه؛ الإكس بتاعته ودكتورته النفسية ومرات أخوه اللي أتوفى وصاحبة بنت أخوه.. كل البنات بتحبك كل البنات حلوين.. ولإن رشدي أباظة كان دنجوان السينما المصرية، وكان مدوخ كل ممثلات زمان في التمثيل وبرا التمثيل.. فشوفنا إن ده أكتر دور لايق عليه، لإنه لو كان موجود معانا دلوقتي كان برضه هيدوخ البنات.
فاتن حمامة – فاتن أمل حربي
فكرنا في فاتن حمامة بالذات من وسط ممثلين زمان لإنها كان لها أكتر من دور في السينما المصرية ناقش قضايا وهموم المرأة، زيّ فيلم “أريد حلًا” اللي اتسبب في تغيير قوانين الأحوال الشخصية، ورحلتها في الفيلم ده كان شبه رحلة فاتن أمل حربي؛ الاتنين كانوا بيعانوا من أذى زوجهم بس فاتن حمامة أخدت حقها .. ياترى فاتن أمل حربي هتتسبب في تغيير قوانين الأحوال الشخصية هي كمان ولا لأ؟
عادل أدهم – فاتن أمل حربي
فاكرين جملة “يا قطة”؟ أشهر جملة في السينما المصرية قالها عادل أدهم وهو بيحرق فستان فرح ميرفت أمين في الفيلم، ومن ساعتها واحنا بنعتبره أيقونة الشر، هو أكتر ممثل قدم أدوار شر في السينما المصرية، وكرهناه فعلًا بدوره في فيلم “حافية على جسر الذهب” ودوره في فيلم “الأشرار” و”طائر الليل الحزين”. استخدم عادل أدوار الشر بذكاء في ملامح وشه الحادة وضحكته الثعبانية وصوته الأجش، وكانوا بيقولوا عليه أفضل شرير في السينما. وبما إن دور سيف في “فاتن أمل حربي” هو أكتر دور شر ومؤذي السنة دي في رمضان، وجاب جلطة لنص ستات مصر، فعادل أدهم كان أكتر واحد هيأدي الدور ده بعبقرية وسلاسة لو كان معانا.
هند رستم – جزيرة غمام
هند رستم معروفة في السينما بأدوار الlady اللي كل الناس كانت بتحبها وبتحب دلعها وضحكتها وحركاتها، نرجس في “صراع في الوادي” وهنومة “في باب حديد” هما أكتر دورين مميزين لها عملتهم بلطافة ودلع. ودور مي عز الدين في شخصية العايقة في “جزيرة غمام” هو أكتر دور ماشي مع شخصية هند رستم وقريب من الأدوار اللي عملتها قبل كده، واحدة حلوة بتقرا الطالع وتتفتح المندل وعايزة تغوي شباب الجزيرة نجيب مين؟ هند رستم.
عبد الله غيث – جزيرة غمام
مسلسل “جزيرة غمام” عامل حالة مش طبيعية عند الناس، أداء الممثلين والأجواء واللهجة الصعيدي المظبوطة خلت كل الناس تتفرج باستمتاع.. وبما إن عبد الله غيث هو واحد من أحسن الناس اللي قدمت دور الصعيدي في الدراما المصرية، فمكانه المناسب في مسلسلات رمضان هو “جزيرة غمام”، سواء شخصية رياض الخولي أو طارق لطفي اللي كلهم عاملين عظمة في المسلسل.
صلاح ذو الفقار – الاختيار 3
صلاح ذو الفقار له كاريزمته وأداه المعروف خصوصًا في أدوار اللي لها طابع مخاباراتي وأكشن، خصوصًا إن مهنته الأساسية أصلًا قبل التمثيل كان ظابط، وده حتى انعكس على طريقة أداءه في التمثيل وانظباطه في شغله، تحسه كده واحد مالي مركزه وهو بيمثل الدور، “المذنبون” و”زيارة سرية” و”الرجل الثاني” وغيرها من الأدوار اللي اتنوعت ما بين قاضي أو ظباط أو محقق.. كل ده خلانا نقول إن أنسب دور له هو ظابط في مسلسل “الاختيار”.
عمر الشريف وأحمد رمزي – سوتس بالعربي
الكميا بين أحمد داود وأسر ياسين فكرتنا بالكميا بين أحمد رمزي وعمر الشريف، ده غير إن عندهم نفس الطلة الحلوة والحضور القوي.
أحمد رمزي اتعرف في كل أفلامه بلذاذته وبضحكته الحلوة وحضوره اللي يخطف القلب، وأحمد داود في “سوتس بالعربي” عنده نفس خفة الدم والحضور ومسمسم برضه زيه. فإيه رأيكم لو أحمد رمزي عمل نفس الشخصية؟
وعلشان الشياكة تكمل، لو جبنا عمر الشريف بدل آسر ياسين؟ آسر عنده كاريزما طاغية زي النجم عمر الشريف بالظبط ومقدم دوره بثبات وبرزانة، تخيلوا لو شوفنا أحمد رمزي وعمر الشريف تاني مع بعض في عمل فني بعد آخر عمل جمعهم من أيام الأبيض واسود! يانهار أبيض يا جدعان…
محمد رضا – الكبير أوي 6
الخناقات اللي كانت بين الكبير أوي ومربوحة في المسلسل فكرتنا بخفة دم محمد رضا في أفلامه، نفس ضحكته المميزة واللطافة وردود الفعل التلقائية، ونفس الشنب يا راجل! والسبب التاني اللي خلانا نختاره هو إنه أكتر واحد في السينما عمل أدوار معلمين القهاوي وولاد البلد، متحمسين نشوف محمد رضا كان هيعمل إيه لو كان مكان الكبير في الفرح وهيعمل إيه مع ولاده التؤام.
كل واحد في ممثلين زمان ودلوقتي كان عنده حاجة بتميزه وحتة كانت بتاعته بيلعب فيها بحرفنة وماحدش كان يقدر ينافسه فيها.. واختيارنا للنجوم دي بالتحديد كان بناءً على تشابه نمط أدوار وإننا نفسنا نشوفهم تاني وسطنا.