في شهر الخير، حبينا نتكلم عن جمعيات ومؤسسات خيرية مش معروفة ومش بتعمل إعلانات، لكن ليها دور كبير ومؤثر في المجتمع وبيعملوا ده بكل حب للي بيخدموهم، والجمعية اللي هنتكلم عنها النهارده هي “دنيتنا” اللي فعلًا بتأسس دنيا جميلة للمكفوفين، مش بس برعايتهم، لكن كمان بدمجهم في المجتمع.. الجمعية بتعرض منتجات للمكفوفين اتعلموا يعملوها وقدروا يثبتوا إن بصيرتهم أقوى.
الجمعية هدفها الاهتمام بالمكفوفين من كل الأعمار، وكمان تنمية مهاراتهم وتأهيلهم وتدريبهم في ورش عمل بتعملها الجمعية، علشان يقدروا يتعلموا حرف مختلفة تكون مصدر دخل ليهم، وفعلًا بيعرضوا منتجات مختلفة مصنوعة بكل الحب.
اتكلمنا مع أ/ حنان حشيش، رئيس مجلس إدارة الجمعية، وكلمتنا عن بدايتها مع العمل الخيري، اللي كانت في 2005، لكن تأسيسها لجمعية دنيتنا كان في 2017، لما حسيت إنها عايزة تأسس جمعية مش بس لرعاية المكفوفين وضعاف البصر، لكن كمان للتركيز على دمجهم في المجتمع وتعليمهم حرف مختلفة تكون مصدر دخل ليهم.
المختلف في الجمعية دي إن المكفوفين وضعاف البصر بيشاركوا في الإدارة، وده أكبر مثال بيتم تطبيقه في الجمعية نفسها لدمجهم في المجتمع.. وغير الإدارة، كمان بيقوموا بالتدريب في ورش العمل اللي بتقدمها الجمعية، من البامبو للكليم للسجاد اليدوي والمكرمية، لحد ورش تعليم الكمبيوتر، وكمان الكورال.
في ورشة صناعة البامبو، حكايات كتير ملهمة لفنانين فعلًا، اتعلموا الحرفة واتقنوها وبينتجوا حاجات مختلفة ومميزة، ومن ضمن القصص دي قصة أمل حصافي، بنت من بنات الجمعية، وبيحكوا قصتها: “بنفتكر لما جات الجمعية من خمس سنين و طلبنا منها تتعلم حرفة البامبو وكانت خايفة و تقول مش هعرف، وبشوية تشجيع من مدام حنان حشيش، رئيس مجلس إدارة الجمعية، وشطارة من أمل، بقيت في فترة قصيرة مدربة بامبو، بتعلم زملائها.. هي اسمها أمل وكلها أمل وطموح وأحلام ندعو الله أن يحقق حلمها وتكون مدربة بامبو عالمية”.
تقدر تشتري منهم المنتجات اللي بيعملوها وتدعهمهم عن طريق التواصل مع الصفحة على فيسبوك من هنا، أو تقدر تتبرع على حساب البنك الأهلي المصري : 2003070923498201012، أو زورهم في مقر الجمعية: ١٨٥ شارع أحمد شوقي، ترام، رشدي الإسكندرية، بجانب سيراميك مظلوم الإسكندرية.