بلاها فرح؟ ليه نفكر نلغي الفرح طالما ممكن بشوية إدارة وورقة وقلم نمشي الدنيا؟ مش شرط تتنازل عن حاجات طالما تقدر تلاقي لها بدايل توفر لك كتير، التفاصيل الصغيرة لو فكرت فيها هتوفر معاك جامد في ميزانية الفرح وتخليك تحقق مفهوم الفرح الاقتصادي ونفرح كلنا وخصوصًا طنط ناهد.
نشن على التوقيت
عارف جملة نشنت يا فالح؟ أيوة احنا عايزينك تطبقها وتنشن على ميعاد الفرح المناسب.. بمعنى إيه؟
الخبراء بيقولوا نبعد عن الليالي الموسمية زي ليلة رأس السنة والأعياد وأيام نهاية الأسبوع لإن حجز المكان بيبقى عالي فيها عن الأوقات العادية، وتبعد على قد ماتقدر عن الصيف والربيع، ولو لاحظت أسعار الأماكن بتختلف لو اخترت معاد الصبح أو بالليل، فنشن برضه على الصبح علشان بيبقى أرخص، وتابع الصفحات أو الأماكن لإنهم أوقات بينزلوا تخفيضات في أوقات معينة؛ منها الأوقات دي علشان يجذبوا الناس لهم.
قلل من المعازيم
قائمة المعازيم أو المدعويين على الفرح من أهم الحاجات وممكن توفر في الميزانية، بمعنى لو قللت أو عرفت أنت عايز تعزم كام واحد هتقدر تحدد مساحة المكان وحجم البوفيه، ودول أهم عنصرين بياكلوا الميزانية، فتقدر تكتب قائمة كاملة وتبدأ بأهم ناس وحاول على قد ما تقدر ماتبالغش في العدد لإنك كده كده هتدفع لهم حتى لو ماجوش، فالأحسن اكتب عدد معقول ولو حصل أي تغييرات أو عدد جيه ماكونتش متوقعه تقدر ساعتها تزود.
المكان
لو كان حد عنده مكان مناسب من معارفك، جنينه مثلًا أو حتى سطح كويس، يبقى ممكن بتفاصيل صغيرة تحولها لمكان مختلف ودي مجموعة من الأفكار البسيطة تقدر تجهز بيها أي جنينة وتبقى مناسبة للفرح من هنا
وفي حلول تانية زي إنك تختار مكان تدفع تمن إيجاره بس، وباقي اللمسات تختارها أنت على حسب ميزانيتك، وفي ظاهرة جديدة دلوقتي بتقولك بلاش قاعات وخلينا في الفيلات المتطرفة “أماكن بعيدة” برضه بتوفر. ودول أفضل 24 فيلا تقدر تنقي منهم المناسب ليك من هنا وممكن تستغنى عن كل ده وتقرر إنه يبقى في البيت زي أيام زمان.
ننزل بورق الحائط
خلصنا من القاعة والمكان والوقت؟ نيجي لبند جديد بياكل الميزانية وهو الديكور، لو جينا حسبناها هنلاقي إن الورد الطبيعي هو أكتر جزء من الديكور مكلف، فالخبراء بينصحوا باستبدالها بالبلالين أو الورورد الصناعية، بتدي شكل مختلف وعصري، ممكن تطلب ده من المسؤولين عن المكان أو تعمله لو أنت شاطر في الأعمال اليدوية، وفي فيديو بيوضح الخطوات دي من هنا .. وممكن تستغنى عن الديكور من الأساسا لو اخترت مكان فيه مناظر طبيعية تخدم على الأجواء وبالتالي مش هيحتاج لشغل كتير.
لازم البوفيه
لازم البوفيه علشان ماحدش يقول حاجة، مش هنلغي البوفيه ولا هنخليه قطعتين جاتوه وساندوتش بسطرمة، بس ممكن نعمل بعض من الحيل ونوفر فيه؛ زي إنك تكتفي بالمقبلات البسيطة والمعجنات، وبتبقى عبارة عن قطع أو أصابع صغيرة من الطعام تقدم في صواني طول الحفلة زي فكرة الـfinger food ولو لقيت قائمة الطعام الخاصة بمكان الفرح غالية ممكن أنت تتفرق مع شركات معينة تتولى هي موضوع الأكل وتختار القائمة المناسبة ليك وتقدم لك مفهوم الـ”كاترينج” ودي مجموعة من الأماكن ممكن تساعدك من هنا وبالنسبة للعصائر تقدر تحدد مشروب واحد أو اتنين من المشروبات الموسمية.
وبالنسبة للحلويات ممكن تستغنى عن فكرة بوفيه الحلويات وتستعين بكيكة الفرح نفسها وتقدم معاها فواكه ده لو أنت عاملها أكتر من دور وتقدر تتفق مع مسؤولين لعمايل الكيكة في البيت زي فكرة الـكاترينج بالظبط.
الدعوات “أجمل التهاني للعروسين”
راح زمن الدعاوي الورقية وإنك تجيب مصمم للدعوات، ممكن تعمل حاجة من الاتنين إما تعمل (event) على الفيس بوك وتدعي فيه كل الناس أو تعمل تصميمك أنت بنفسك من على موقع اسمه “كانفا” من غير ما تكون عندك مهارة في التصميم.
نفس الكلام على البوكيه، بدل ما نجيبه جاهز ممكن نروح لمحل الورد ونطلب منه تصميم بوكيه مناسب للميزانية أو حتى تعملها بنفسك ودي خطوات تقدر تساعدك من هنا
قليل من الحيل لا يضر
- فستان الفرح نقدر نوفر فيه بأكتر من طريقة، إما إننا نبعد عن الأسماء الكبيرة ونشوف حد يقدر ينفذ لنا التصميم زي ما احنا عايزين، زي ترزية موثوق فيهم أو إننا نأجر فستان اتلبس مرة واحدة وكإنه جديد، أو لو روحت اتيليه تقدر تختار من تصاميم السنة اللي فاتت بتبقى أرخص في أسعارها ونفس الشيء بالنسبة للعريس.
- لو هتشتري كميات لأي حاجة تخص الفرح اشتري من مكان واحد بالجملة علشان تاخد خصم.
- حاول تستغنى عن فكرة “منظم الحفلات” أو الـ”ويندج بلانر” تقدر أنت تنظم كل حاجة دلوقتي ببرامج خاصة بالميزانية ومواقع معينة ودول 10 تطبيقات هتساعدك في تجهيزات الفرح من هنا
- خبيرة التجميل ومصور الفرح دول برضه ميزانية لوحدهم ممكن تستبدلهم بأشخاص عن الأسماء الكبيرة وتلجأ لناس من محيطك عندهم الموهبة، أو ناس عندها خبرة بس لسه بتبدأ خصوصًا إن دلوقتي فكرة الكاميرات الغالية بدأت تختفي ويظهر مكانها تقنيات التصوير بالموبايل. وفي موقع اسمه(sharp lens) تقدر تتواصل معاهم وهو يرشحلك مجموعة تكون مناسبة لك.
- لو مش عايز فرح خالص، ممكن تعمل outing ويبقى احتفال على الضيق مقتصر على المقربين.
دي كانت مجموعة من النصائح ممكن تساعدك وتاخد بإيدك، وافتكر إن أي حاجة مكتوبة بالورقة والقلم تقدر تتحكم فيها وتبدلها، فسجل تكلفة كل بند من الأفراح وشوف تقدر تستغنى عن إيه أو تقلل إيه، وتهانينا للعروسين.