في الوقت اللي مصر كانت بتشهد فيه موكب المومياوات الملكية، كان بطل مصر في المصارعة الرومانية عبد اللطيف منيع المصنف التاني عالميًا، بيمثل مصر في تصفيات أفريقيا المؤهلة لأولمبياد طوكيو 2021، وكسب الميدالية الذهبية بعد ما كسب بطل الجزائر 8-0 في نصف النهائي، وفاز على بطل المغرب في المباراة النهائية، ضمن منافسات وزن 130 كجم في تصفيات أفريقيا بتونس، واللي بتأهل لدورة الألعاب الأولمبية طوكيو 2021، فحبينا في سكوب إمباير نتكلم مع بطلنا عن مشواره وخطواته الجاية واستعداده للأولمبياد.
وقالنا عبد اللطيف إنه بدأ يلعب المصارعة الرومانية من وهو عنده 8 سنين، وده بعد الإنجاز التاريخي اللي حققه البطل كرم جابر، لما كسب الميدالية الذهبية في أولمبياد أثينا 2004، والإنجاز ده شجعه إنه يلاقي شغفه الحقيقي، وخلاه يعمل طفرة في المصارعة الرومانية في مصر، وبكده بقى ليها قاعدة جماهيرية كبيرة، ووالده كان أكتر الداعمين ليه وبدأ يشجعه على إنه ينمي موهبته لإنه هو كمان كان عنده شغف بالرياضة في العموم، وللمصارعة بشكل خاص، وخصوصًا بعد ما مدربين كتير أكدوله إن عبد اللطيف ممكن يرفع علم مصر في يوم من الأيام.
أما بالنسبة للتحضيرات لتصفيات أفريقيا، فقال إنها كانت كلها تحديات، لإنه أصيب بكورونا قبل البطولة بوقت قليل في معسكر المنتخب، وكان خايف يفقد وزنه في فترة العلاج والعزل، فبدأ يستخدم الإمكانيات المتاحة في فندق العزل علشان يعمل التمارين الرياضية، تحت إشراف المدربين، وكان طول الوقت مركز على التأهل للأولمبياد لإن ده حلمه من زمان.
وحقق عبد اللطيف أكتر من 11 بطولة أفريقية، ومركز تالت ببطولة عالم عسكري، والميدالية الفضية ببطولة روما الدولية للمصارعة الرومانية، و4 جوائز كبرى، وقال إنه بيحلم يحصد ميدالية أولمبية في طوكيو، خصوصًا بعد مشاركته في أولمبياد ريو دي جانيرو والخبرات اللي اكتسبها وساعدته إنه يحقق حلمه، وكمان شكر وزارة الشباب والرياضة واللجنة الأولمبية على الدعم والمساندة.