من إمبارح انتشر كلام عن لاعبة تنس الطاولة هنا جودة، بطلة النادي الأهلي وبطلة مصر صاحبة الـ 13 سنة، بسبب عدم اختيارها للمشاركة في أولمبياد طوكيو اللي بيحلم بيها كل أبطال ولاعبي مصر، وعبرت هنا عن ده في بوست على صفحتها الرسمية على فيسبوك، لكن ده تسبب في أزمة ليها مع النادي الأهلي، اللي أصدر قرار بوقفها وتحويلها للتحقيق بسبب اللي نشرته على السوشيال ميديا، واللي بيتعارض مع سياسة النادي، فتعالوا نشوف إيه اللي حصل.
ده البوست اللي نزلته هنا جودة، وموجود فيه تعليق للمتحدث الرسمي لوزارة الشباب والرياضة بيقول إن الأمر هيتعرض على الوزير مباشرة وهيشوف إذا كانت اللوائح بتسمح بده ولا لأ.
مش بس هنا، كمان اللاعبة مريم الهضيبي ردت على هنا ببوست على صفحتها في نداء وتوضيح، وطالبت كل الجهات المعنية بعدم السماح لهنا جودة بالمشاركة لعدم تحقيقها معايير المشاركة في الألعاب، وقالت إن هنا جودة لا تستحق التواجد في الأولمبياد.
النادي الأهلي تدخل، وقرر رؤوف عبد القادر، مدير النشاط الرياضي بالنادي الأهلي، إيقاف هنا جودة ومريم الهضيبي وإحالتهم للتحقيق، لإن اللي قالوه على مواقع التواصل الاجتماعي بشكل غير لائق بيتعارض مع ثوابت وسياسات النادي، وده في خبر على الموقع الرسمي للنادي الأهلي.