أعلنت شركة أبل نهاية أسطورة أجهزة آيبود اللي ساهمت في تغيير صناعة الموسيقى في العالم كله لعشرين سنة كاملة، الأجهزة اللي كان ليها تأثير كبير على الموسيقى وانتشارها غيّر من ثقافة الملايين. وفي المقال ده، هنعرف ازاي الأجهزة دي، سواء آيبود أو وكمان أو غيرها من الأجهزة المنقرضة، غيرت من ثقافتنا في مصر والعالم العربي.
الوكمان وثقافة البوب
الحكاية بدأت من الوكمان اللي أنتجته شركة سوني سنة ١٩٧٩، وأعلنت وفاته رسميًا في ٢٠١٠، وللمفارقة وعلشان توسع المجال لأجهزة زيّ آيبود وغيرها، عملت ثورة جديدة في عالم وثقافة الموسيقى وطريقة سماعها وانتماء كل واحد ليها.
لو أنت من جيل التمانينات أو التسعينيات، فأغاني لأسطورة البوب مايكل جاكسون أو مادونا أو أغاني زيّ “باربي جيرل” و”كوكو جامبو” وغيرها انتشرت بسبب الوكمان، اللي كل شاب في الوقت ده كان ماشي بيه تقريبًا أو بيسعى إنه يمتلكه ويسمع فيه الأغاني اللي بيحبها في كل مكان بيروحه. الوكمان كان هوية لكل واحد ودي الثقافة اللي انتشرت مع مطربين زيّ حميد الشاعري وعمرو دياب وإيهاب توفيق وغيرهم، وسمعنا فيهم وشرايط وألبومات زيّ “واتس ناو” في النص التاني من التسعينيات.. وكل دول تقدر تشوف ازاي أثروا في طريقة اللبس والذوق العام، وصورهم كانت موجودة في أوض الشباب، وأتحولوا لظاهرة ساهمت في تسابق المُعلنين عليهم بسبب شعبيتهم العالية وتقليد الشباب ليهم.
الوكمان ومفهوم الحرية والروشنة
التغيير في الثقافة وطريقة التفكير بسبب وكمان كانت كبيرة، الحرية كانت العامل الرئيسي في الترويج ليه من خلال مفهوم الاستقلال بصور لمجموعة شباب بيسمعوا مزيكتهم وهما بيعملوا اللي بيحبوه وبيسمعوا في نفس الوقت أغانيهم عن طريق الوكمان. ونائب رئيس شركة سوني وقتها قال إن الهدف من وكمان إنه يخلي الأنشطة اليومية المملة تبقى ممتعة مع لمسة ستايل إنك تمتلك جهاز شكله حول بتسمع فيه الأغاني اللي بتعبر عنك، وده يفسر في العالم العربي ظهور مفهوم الروشنة.
آيبود وتغيير عالم الموسيقى
في بدايات الألفية الجديدة، استحوذ آيبود على عقول وأفكار الشباب و”أدى كتف” زي ما بيقولوا للوكمان صاحب الفضل الحقيقي لثورة فكرية، اختلفت أو اتفقت معاها، فهي كانت مؤثرة، ونقدر نقول إن آيبود غيّر مسار الثورة دي أو طورها بعد ما استحوذ على عقول وأفكار الشباب وعمل نقلة كبيرة في طريقة السماع للموسيقى وعالمها.
الشكل طبعًا كان عامل مهم، زيّ ما وكمان سبق بده من عشرين سنة قبل ٢٠٠١؛ جهاز بسيط وشكله حلو وروش أكتر وعليه ألف أغنية بتسمعهم فأي مكان بسهولة، وده كان تمهيد لإزاحة كل الأدوات والأجهزة القديمة من عالم الموسيقى، وبالتالي التأثير عليها وعلى سرعة طرح الأعمال وانتقالها فيها.
الوصول للأغاني اللي بيحبها كل واحد فينا بقت أسهل وأسرع وبأرسعار أرخص من شراء الألبومات، وكمان بتحفظها على الجهاز الصغير.
انقراض آيبود وسنة الحياة
ظهور آيبود كان بداية لظهور الأجهزة الذكية وده ماكانش منتشر وكان مزعج للبعض، ومع ذلك نجح آيبود في تغيير الموسيقى بشكل كبير؛ إنك تعيد أغنية أو جزء منها بسهولة وتسمعه تاني كان شيء مبهر ساعتها، وده اللي خلى الناس يشوفوا قد إيه الأجهزة الذكية دي مفيدة.
اختفت أجهزة آيبود في السنين الأخيرة وده لإنها بقت غير مفيدة وده لعوامل كتير؛ أولها أجهزة أبل نفسها اللي وفرت كل اللي بيعملوا آيبود في “آيفون” أو “آيباد”، ده غير اعتمادها على أبل ميوزيك، خصوصًا بعد ما ظهر سبوتيفاي مثلًا وغيره اللي بيوفروا عدد غير محدود من الأغاني كل شهر مقابل اشتراك بسيط.
إيه هي ثقافة البوب؟
ثقافة البوب ممكن نقول عليها الثقافة الشعبية العالمية بس برضه مش ده المعنى بشكل حرفي، هي ثقافة مهما أنتشرت في بلدان مختلفة إلا إنها أمريكية الأصل وبتمثل القوى الناعمة لثقافتها ونجومها اللي أتنقلت لعالم الترفيه عن طريق وسائل الإعلام زيّ “إم تي في” والمجلات والأغاني اللي سمعناها بالوكمان زمان وأفلام هوليود.
يعني مثلًا اغنية زيّ “باربي جيرل” أو “مكارينا” كانوا في كل مكان في مصر، والشباب كان بيسمعها في الوكمان مع غيرها طبعًا. الناس شافت صورهم في المجلات الأجنبية خصوصًا اللي بتتباع في مناطق زيّ الزمالك، وهنا انفجرت الثقافة دي في طريقة اللبس، وبالتالي تغيير الذوق والثقافة العامة اللي أتجهت للعالمية أكتر.
مع ثورة الإنترنت، ظهرت الأجهزة الذكية زي آيبود وبقت “ثقافة البوب” في كل مكان والناس بتوصلها بسهولة وبقت أسرع لدرجة ‘ن تغيير الوسائل اللي بنعتمد عليها للتعرف على العالم بتتغير؛ يظهر البلاكبيري ويختفي لصالح آيفون، انفجار منصات السوشيال ميديا المختلفة زيّ إنستجرام، وظاهرة الصور السيلفي، وظهور آمازون، ونتفليكس، وبالتالي بقى الوصول للنجوم اللي بيمثلوا الثقافة دي أسهل وأسرع وفي كل مكان وتقليدهم في الشكل والمضمون بقى هو الأساس.
لخبطة ثقافية واضحة.. ممكن نلاحظها بشكل واضح بس بتعبر عن انتشار ثقافة البوب العالمية، وحاجة زيّ الفرق الكورية اللي بقى ليها متابعين بالآف حول العالم وفي عالمنا العربي وفي مصر وهي فرق كورية بس بثقافة بوب عالمية، وكل ده بفضل الأجهزة الذكية اللي أتكلمنا عنها.