بعد أزمة تصويره مع الدولارات.. محمد رمضان يتبرع لمرضى معهد القلب
بواسطة: هبة لاشين
تعرض محمد رمضان لانتقادات عديدة في الأيام اللي فاتت بسبب نشره لصورة له في طيارته الخاصة مع حزمة دولارات في الكرسي اللي جنبه، واللي استفزت ناس كتير من المتابعين وكانوا بيطالبوه بمسحها لمراعاة مشاعر الغير.
وعلق الدكتور جمال شعبان، عميد معهد القلب السابق، على الصورة وقال: “ياريت بالدولارات اللي واضح إنك مش محتاجها، تتبرع بيها أحسن وتشتري منظمات كهربية للغلابة اللي في العناية المركزة وعندهم احتمالية كبيرة للإصابة بالسكتة القلبية والتوقف القلبي المفاجئ، يمكن ده يشفعلك يوم الزحام”.
استجاب محمد رمضان لطلب الدكتور، وطلب منه أرقام المستشفيات والتليفونات عشان يتبرع لهم بالمبلغ اللي محتاجينه، وبالفعل قابل دكتور جمال وقدم له كل الدعم المادي اللي محتاجاه مستشفيات القلب، سواء فلوس أو شراء الأجهزة اللي محتاجاها المستشفى.
وشكر دكتور جمال شعبان محمد رمضان على سرعة الاستجابة لطلباته، وقال إنه بالفعل تم تركيب أول جهاز لمرضى القلب والتي تصل قيمته لـ 300 ألف جنيه مصري، وبدأنا بالفعل بالتواصل مع أول حالة من المنيا.
والجدير بالذكر إنها مش المرة الأولى اللي يثير فيها محمد رمضان الجدل على السوشيال ميديا ويتعرض بسببها لهجوم كبير من الجمهور، زي واقعة نشره لصورة في كابينة الطيارة والتي تسببت في رفد الطيار وسحب رخصة القيادة الدولية منه وبالتالي خسر شغله مدى الحياة.