عمر العقاد صحفي مصري كندي فاز بجائزة سكوتيابنك جيلر واللي تعتبر أكبر جائزة كندية في الرواية لسنة 2021، وقيمتها 100 ألف دولار كندي.
حفل تكريم العقاد كان في مدينة ترونتو يوم الاتنين عن رواية “يا لها من جنة غريبة” “What A strange Paradise “واللي بتحكي عن الأطفال اللاجئين في كل دول العالم وعن الأزمة اللي بيعيشوها بشكل عام، وبيطرح من خلالها أسئلة كتيرة عن اللامبالاة والعجز اللي بيعيشه أي مجتمع بيوصل أطفاله لحياة بلا مأوى في النهاية.
عمر العقاد ماكانتش دي أول جائزة ياخدها في كندا، من أول ما بدأ العمل الصحفي وهو أثبت نفسه من خلال تقارير مهمة كانت بتتكلم عن حرب اللي قادها حلف النانو في أفغانستان، وتقارير عن المحاكمات العسكرية في خليج جوانتانامو، لدرجة إنه أخد جائزة أفضل صحفي وجائزة جيف بيني التذكارية للصحفيين الشباب الكنديين، بجانب تلات جوائز تانية وطنية.
في حوار صحفي معاه قبل كده، اتكلم عن خمس روايات بالتحديد، وقال إنهم كانوا نقطة تحول في حياته وأثروا فيه بشكل أو بآخر. كان منهم رواية الموت في الأسرة وكانت أكتر حاجة شدته للرواية إن أحداثها كانت بتدور في 90 دقيقة بس، ده غير إنها وافقت الفترة اللي قراها فيها.
ورواية الثلاثية لنجيب محفوظ لإنه كان بيشوفها إنها حقيقية وواقعية وبتفكره بأيام طفولته اللي كانت في الحسين ومصر القديمة، ورواية “What belongs to you” واللي اعتبرها روت قصة الحب بشكل أكتر صدقًا وواقعية من أي رواية تانية قراها في حياته وكل كلمة في الكتاب كانت زيّ الموسيقى بالنسبة له.
