من حوالي شهرين حصل خناقة بين حسن شاكوش ورضا البحراوي على المسرح. لما حصل خلاف بين الاتنين وقال رضا البحراوي على المسرح “فين حسن هو هرب”، وده اللي اعتبره شاكوش إهانة وبالتالي خلال حفلته المُقامة في شرم الشيخ رد عليه، وبدأ يقول إفيهات من فيلم حين ميسرة بتحمل فيها اسم رضا، وخلى الجمهور يردد وراه الإفيه وكلام تاني اعتبره الناس إنه خارج. وبالرغم من إن الطرفين ظهروا واعتذروا للجمهور ولبعض، وفعلًا تم التصالح بينهم في النهاية، إلا إن النقابة كان ليها رأي تاني.. وتم وقف الاتنين عن الغنا.
وامبارح قال هاني شاكر نقيب المهن الموسيقية في برنامح إي تي بالعربي إن اللي عمله شاكوش “شيء خطير إنه يؤدي الغناء بكلمات غير أخلاقية، والفن مش محتاج النوع الغريب ده من الغناء”، وقال في نهاية الكلام “بناقص حسن شاكوش”. وبكده يكون أعلن انتهاء مسيرة حسن شاكوش نهائيًا، بعد ما توصل هاني شاكر مع كل المجلس لقرار سحب ترخيصه تمامًا وبدون رجعة. وقال منصور هندي، رئيس لجنة العمل بنقابة الموسيقيين إن شاكوش حاول التصالح مع النقابة ولكن ده ماغيرش من قرار النقابة اللي اتاخد ضده.
هاني شاكر يعلن انتهاء مسيرة حسن شاكوش الفنية نهائيًا
? “الغلط اللي غلطه ده انا و كل المجلس معايا سحبنا ترخيصه تمامًا و نهائي بدون رجعة ” وبهذا يحسم هاني شاكر موضوع عودة حسن شاكوش للغناء بعد توقيفه من قبل نقابة المهن الموسيقية على خلفية مشكلته مع رضا البحراوي قبل حوالي شهرين.
ويبدو أن أزمات الفنانين مع نقابة المهن الموسيقية لا تنتهي، فمؤخراً أوقفت النقابة استخراج تصاريح الغناء لمغني الراب مروان بابلو على خلفية قيام زميل له بتقديم التحية مستخدمًا ابتهالا دينيًا.. فكيف علّق هاني شاكر على هذا الموضوع ؟ وما موقفه من #محمدرمضان؟ شاهدوا التعليق هنا ◀️ https://etbilarabi.com/node/23305Posted by ET بالعربي on Sunday, November 7, 2021
أما من ناحية حسن شاكوش، فمن خلال مداخلة تليفونية في برنامج الحكاية، عبر عن احترامه لقرار نقيب المهن الموسيقية والنقابة، لحد آخر لحظة. وعلق على جملة “بناقص حسن شاكوش” إن أستاذ هاني شاكر يقول اللي هو عايزه. ولما اتسأل عن وجود بديل لشغلانة تانية، قال إن الفن هو مهنته ومصدر رزقه الوحيد. وقال كمان إن كل شغله وإحياء حفلاته كان برا مصر فقط، احترامًا لقرار النقابة.
وأكد إن المشكلة اللي حصلت بينه وبين رضا تم حلها بالفعل، وأكد إن دي “أول غلطة له” وإنه عمل اتصالات كتير علشان يحاول يحل المشكلة.. لإنه عايز يرجع يشتغل جوا بلده. وقال إنه حاليًا كان بيسجل أغاني علشان تنزل على اليوتيوب، ولكنه مالوش نفس يشتغل نظرًا لمنعه من عمل مهنته الأساسية وهو إحياء الحفلات في مصر. واتمنى في النهاية انه يقدر يتوصل لحل للأزمة دي.