يوم بعد يوم، العالم بيستوعب مدى أهمية الأطقم الطبية اللي واقفة في الصفوف الأمامية في الحرب ضد وباء الكورونا (كوفيد 19). وإحنا محتاجين دلوقتي، أكتر من أي وقت فات، إننا نزود وعينا بأساسيات الطب والعلوم، ولازم نستثمر وقت أكتر في البحث وتعليم نفسنا من مصادر موثوقة.
ولو معندكش وقت تشوف فيديوهات طويلة أو تقرأ مقالات طويلة ومُعقدة على الإنترنت، يبقى إنت أكيد محتاج تشوف قناة اليوتيوب الخاصة بطالب الطب المصري يوسف زهدي “الطب سهل”. يوسف بيدينا في فيديوهاته القصيرة معلومات مبسطة عن موضوعات طبية وعلمية جديدة علينا أو مفهومة بشكل خاطئ في مجتمعنا.
يوسف بينزل فيديو جديد كل أسبوع على صفحاته على السوشيال ميديا، ولما اتكلمنا معاه قالنا “بدأت القناة دي بهدف شرح المعلومات الطبية بأبسط طريقة ممكنة علشان يقدر أي حد يفهمها ويكون واعي باللي بيحصل في العالم وجوا أجسامنا. أنا كمان بحاول أصلح أكبر قدر من المفاهيم الطبية الغلط اللي بنعملها أو بنواجهها كلنا في حياتنا اليومية”.