الشهرة شيء مُحبب ومرغوب لمعظم الناس، وده شيء طبيعي ومش المفروض نستغربه أو نحكم عليه، ولكن فكرة إن مفيش “حدود واضحة” أو قواعد معينة تحدد لينا لو حد تخطي حدوده ولا لأ من حيث المحتوي أو الهزار أو حتي طريقة تناول للموضوع، بيسبب إن جدل كبير معظم الاوقات فبتنقسم الناس بين مؤيدين ومعارضين.. وده اللي حصل بظبط في قضية اليوتيوبرز أحمد حسن وزينب.
الموضوع بإختصار للي ميعرفش هو إن اليوتيوبر زينب في مقطع فيديو المفروض إنه مقلب، بتغير لون وشها عشان يكون غامق ومختلف وبتبتدي تقرب من بنتها وتصحيها من النوم مفزوعة، فالبنت بتعيط بحرقة طوال الفيديو وبتفضل تبكي لحد ما تروح في النوم. فبعد ما نشر الثنائي الفيديو علي قناتهم على اليوتيوب، في إنتظار انه يضحك ويعجب جمهورهم، إتفاجئوا برد فعل مختلف تماماً.
ترهيب الطفلة وإفزاعها لمجرد عمل محتوي تحت مسمي إنه “هزار” أثار غضب كتير من الناس اللي اعتبروا إنهم بيستغلوا وبيتربحوا من ورا بنتهم، دون أيّ مراعاة لحالتها النفسية. وده اللي دفع أحد المواطنين إنه يرفع قضية ضدهم ويطالب المجلس القومي للأمومة والطفولة انهم “ينقذوا البنت من العائلة المريضة نفسيًا اللي بتستغل طفلتهم للشهرة وجني الفلوس” زي ما صاحب البلاغ قال.
من ساعة ما شاف مقطع الفيديو “عملنا مقلب في إيلين” النور علي منصات السوشيال ميديا، موقفش الكلام عنه وشلالات من الإنتقادات نزل عليهم حتي من قبل بعض المذيعين. فدي مش أول مرة يستخدموا طفلتهم في مقاطع فيديوهاتهم ففي مرة تانية مثلت الأم علي بنتها إنها فاقدة للوعي مما تسبب في ذعر البنت وإنهيارها من البكاء، وبالفعل كان تم رصد حوالي 5 فيديوهات وتم إبلاغ النيابة العامة عنهم، ولكن تم حفظ المحضر بعد وعود من الأبوين بعدم تكرار الفعل ده، بالإضافة لدفعهم غرامة 200 ألف جنيه لجمعية حقوق الطفل قبل كده، زي ما وضح صاحب البلاغ.
وعلق صبري عثمان مدير عام خط نجدة الطفل بالمجلس القومي للطفولة والإمومة إن عدم إكترات الأسرة ببنتهم أصبح متكرر وإنهم بيبدوا الأرباح المادية علي بنتهم وصحتها النفسية، وإنهم بيعتبروها أداة لجني المال. “هذا مسلسل جديدة من حالتهم السيئة، وللأسف هؤلاء يجنون أرباحًا على حساب الطفلة والمجتمع، والواقعة مخالفة للقانون”.
وتابع عثمان ان ده يُعتبر “استغلال تجاري لطفلة”، اللي يُعتبر جريمة عقوبتها في قانون مكافحة الاتجار بالبشر ممكن توصل للسجن المؤبد، وغرامتها 500 ألف جنيه، لأن الجريمة وقعت من الأب والأم ضد طفل. لسه هيتم فتح تحقيق قضائي بشأن الموضوع وهيتم إحالة الاوراق إلي النيابة.