بمناسبة احتفال محمد حفظي بعيد ميلاده في الأوسكار: أفلام من إنتاجه أثارت الجدل
أعلن المنتج والسيناريست محمد حفظي في سنة 2019، عن انضمامه رسميًا كعضو في أكاديمية فنون وعلوم الصور المتحركة (الأوسكار)، وبيحتفل النهارده 13 مارس، بعيد ميلاده خلال وجوده في الاحتفالية السينمائية الأضخم، في هوليوود الولايات المتحدة.
![](https://ar.scoopempire.com/wp-content/uploads/sites/4/2023/03/download.jpg)
بيقول حفظي في تصريح خاص لـ (سكوب إمباير) من هوليوود: “فخور جدًا بتمثيل مصر كعضو في الأكاديمية”، وبيضيف: “وجودي في الأوسكار بيديني فرصة أتفرج على أفلام على قد ما أقدر علشان أصوت للأعمال الأفضل بناءً على قناعة وإلمام كاملين”.
وبيأكد حفظي إنه سعيد جدًا بوجوده في (الأوسكارز – Oscars) لإنه بيشوف الاحتفال بالأفلام العظيمة دي مباشرةً، وبيتواصل مع صُناع السينما العالميين. وفي السياق ده، بيأكد إنه السنة دي، بداية من بكرة 14 مارس ولمدة أسبوع، بيعمل اجتماعات مع السينمائيين من مختلف أنحاء العالم للمرة الأولى خلال احتفالية الأوسكار.
بيختتم حفظي كلامه وبإنه فخور جدًا إنه بيحتفل بعيد ميلاده النهارده، في الأوسكار، وإن أمنية عيد ميلاده هي إنه يشوف واحد من أفلامه مرشح لجوايز الأوسكار.
مع فخرنا بوجود سينمائي مصري قدير زيّ حفظي النهارده كعضو في أكاديمية فنون وعلوم الصور المتحركة (الأوسكار)، بنتمنى نشوف أفلامه ضمن قائمة ترشيحات الأوسكار في المستقبل، وهنناقش في باقي المقال مكانة حفظي كصانع سينما قدير، وأهم أفلامه اللي سببت موجة من الجدل وفتحت الباب لنقاشات جادة في المجتمع.
محمد حفظي: بين السينما والجدل
محمد حفظي هو واحد من أهم المُشتغلين في صناعة السينما في الوطن العربي حاليًا، وجزء مهم جدًا من شهرته بيرجع لتقديمه أعمال مثيرة للجدل، وتعرضت أفلامه للهجوم من فئة مش قليلة من المشاهدين.
أعمال حفظي هتفضل من أهم الأعمال الفنية على الساحة العربية، لإنها قادرة دايمًا على تحريك مشاعر المشاهد وفتح نقاش في المواضيع اللي بتتطرق لها، ولإن الجدل والنقاش حوالين المواضيع دي مهم، قدرت أعمال حفظي تثبت نفسها كعلامات فارقة في السينما العربية.
ومن أهم الأفلام اللي أنتجها محمد حفظي وقدرت تجبر المشاهدين على فتح نقاشات جادة بخصوص القضايا اللي تناولتها.
الشيخ جاكسون
![محمد حفظي](https://ar.scoopempire.com/wp-content/uploads/sites/4/2022/03/13111802-v2_xlarge.jpg)
أحداث الفيلم بتبدأ يوم الخميس 25 يونيو 2009 بخبر وفاة مايكل جاكسون، وازاي الخبر ده بيأثر على شيخ كان اسمه جاكسون أيام الدراسة، وتستمر أحداث الفيلم بسؤال إيه اللي يربط شيخ وإمام مسجد بمايكل جاكسون؟ والسؤال الأهم، هل هيقدر يمارس حياته بشكل طبيعي بعد كده، ولا ذكرياته وعلاقاته بالناس اللي بيحبهم هتغير حياته؟
الفيلم من إنتاج محمد حفظي، وبطولة أحمد الفيشاوي، نزل في السينمات سنة 2017، وسبب جدل كبير جدًا.
ورغم الجدل الكبير اللي أثاره الفيلم إلا إنه نجح جدًا، وفتح نقاش مهم جدًا ما بين المشاهدين عن معنى التدين وقيمة الفن، والفصل ما بين العلاقة الشخصية للإنسان بربه وما بين الصورة الاجتماعية اللي الإنسان بيصدرها للآخرين.
أميرة
أحداث الفيلم بيحكي عن أميرة، المراهقة الفلسطينية اللي اتولدت من عملية تلقيح مجهري بعد تهريب نطفة والدها نوار السجين في المعتقلات الإسرائيلية، لكن لما تفشل محاولات إنجاب طفل تاني وتكتشف إن والدها نوار عقيم، تتقلب حياة أميرة لما تعرف إن والدها البيولوجي هو جندي إسرائيلي في نفس السجن اللي نوار فيه.
أميرة هو فيلم أردني من إنتاج محمد حفظي، وسبب موجة جدل كبيرة جدًا على السوشيال ميديا، وكان أكبر عنصر في عناصر الجدل ده هو غضب الفلسطينيين اللي اتهموا الفيلم بإنه إساءة لقضية الأسرى الفلسطينيين في السجون الإسرائيلية.
بدأ الجدل ينتشر أكتر على السوشيال ميديا بعد عرض الفيلم في مهرجان كرامة لأفلام حقوق الإنسان في عمان، واتصدر تريند الأردن على تويتر هاشتاج اسحبوا فيلم أميرة، وطالب الناس بسحب الأردن الفيلم من ترشيحاتها لجايزة الأوسكار.
الفيلم فتح الباب للنقاش عن القضية الفلسطينية بواقعها الحي النهارده، وتعقيدات القضية السياسية على الإنسان وهويته وتكوينه وانتمائاته السياسية والوطنية والبيولوجية.
ريش
![](https://ar.scoopempire.com/wp-content/uploads/sites/4/2022/03/121141122_untitled.jpg)
بتدور أحداث الفيلم في إطار من الدراما والخيال، وبيحكي قصة عيلة تضطر تعيش فترة من الاكتشاف الذاتي بعد ما يحول ساحر رب الأسرة المُستبد، الأب، بالغلط لفرخة في عيد ميلاد واحد من الأولاد، وتبدأ أحداث الفيلم تكشف عن واقع مزري من الفقر والضعف والخضوع.
سبب الفيلم، اللي اتعرض لأول مرة في الدورة الأخيرة لمهرجان الجونة السينمائي وأخد في الختام جايزة أفضل فيلم عربي، موجة شديدة التناقض من المواقف وردود الأفعال من نقاد وفنانين ومستخدمي السوشيال ميديا؛ في ناس كانت شايفة إن الفيلم الروائي الأول للمخرج الشاب عمر الزهيري فيه إساءة لسمعة مصر، وفي ناس تانية كانت شايفة إنه فيلم واقعي بيدور في إطار من الخيال.
ولكن وسط البلاغات والتناقض ده في الأراء، قدر الفيلم يفتح نقاش عن معنى الفن وقيمته للشعب، وعن انعكاسات الفن ما بين الخيال والواقع، وده كان نقاش مهم جدًا وأثرى الثقافة الفنية كتير.
صالون هدى
بتدور أحداثه عن قصة حقيقية عن ست اسمها هدى عندها محل كوافير في مدينة بيت لحم، بتروح عندها أم شابة اسمها ريم على طول علشان تعمل شعرها، فتحاول هدى ابتزازها بعد تصويرها في مواضع مخلة مع جندي من المخابرات الإسرائيلية، علشان تشتغل معاهم وتخون بلدها، وتتقلب حياة ريم.
اتعرض الفيلم لهجوم قاسي خلال الأيام اللي فاتت، ووصفه الجمهور بإنه مسيء للمرأة الفلسطينية، وكان في غضب من وجود مشاهد عري.
ورغم النقد اللي اتعرض له الفيلم، إلا إنه فتح نقاش عن قيمة المقاومة الفلسطينية، وحرية التعبير الفني، وقسوة الاحتلال وفساد سلطاته وأجهزته التنفيذية، وكمان عن الفكر الذكوري داخل المجتمع الفلسطيني اللي ممكن يكون داعم غير مباشر لأساليب الاحتلال الفاسدة في تجنيد الفلسطينات من خلال ابتزازهم.
اتعرضت أعمال محمد حفظي للهجوم كتير بسبب تطرقها لقضايا حساسة، بالذات في المنطقة العربية، زيّ قضية الأسرى الفلسطينيين في السجون الإسرائيلية، وقضايا زيّ النسوية والفقر والتدين والعلاقات الزوجية والخيانة، لكن مافيش شك إنها فتحت نقاشات جادة عن الموضوعات دي.