النظام الغذائي اللي بنسمع عنه من يوم ما أتولدنا؛ نظام بيعتمد على أسلوب معين وكميات معينة من الأكل مع ممارسة رياضة، علشان جسمك يكون في أحسن حالاته شكلًا وموضوعًا، دي حاجة عادية وبديهية في حياتنا. اللي مش عادي، إننا في دوامة السعي ورا المثاليات، بنلاقي أشخاص بتستغل ده، وتنشر أنواع غريبة من الأنظمة الغذائية ويوهموا الناس إنه نظام سحري هيخسسك نص وزنك في وقت قياسي، مش مهم بقى ده هيحرم جسمك من عناصر غذائية محتاجها، أو هيعرضك لأمراض لاقدر الله. والأنواع والخرافات دي انتشرت بشكل كبير على السوشيال ميديا، حبينا نتكلم مع دكتورة متخصصة ونفهم منها أكتر إيه خطورة أنواع الدايت المؤذية دي، وإيه أشهرهم.
اتكلمنا مع متخصصة التغذية نور الجنزوري، علشان نعرف منها أكتر عن الأنظمة الغذائية اللي ممكم تضر الجسم أكتر ما هتنفع، وقالتلنا إن “أكتر أنواع الدايت اللي بتؤذي الجسم بيكون الدايت القاسي، اللي بيعتمد على سعرات حرارية أقل من احتياج الجسم بكتير، ومش بيكون فيها العناصر اللي تخلي الجسم يشتغل بشكل طبيعي وصحيح.
“في رأيي، الأنظمة الغذائية دي والدايت القاسي يعتبروا أسوء الأنواع بسبب إنه مش بيعتمد على أسلوب حياة دائم، وبيكون مجرد نظام محكوم بوقت معين بيخلي الشخص يخسر وزن، لكن بمجرد التوقف عن النظام ده، الجسم بيكون قابل لزيادة الوزن مرة تانية، ويمكن كمان ترجع تاكل أكتر من الأول وبكميات أكبر من المعتادة لإن جسمك في فترة الدايت دي كان في حالة مجاعة أو starvation.”
النظام الغذائي اللي بيعتمد على نوع معين من الأكل لمدة محددة، زي دايت الموز مثلاً اللي سمعنا عنه مؤخراً، بتفضل حوالي ٣ أيام مش بتاكل حاجة غير الموز، وتستنى إن جسمك يفقد وزن بطريقة سحرية، أنت أكيد هتخسر وزن بسبب إنك مش بتدي لجسمك احتياجاته اليومية من العناصر الغذائية المختلفة من بروتين وكربوهيدرات وفيتامينات، فلما تفرح إنك خسرت وزن في وقت قياسي، ماتفرحش علشان أنت خسرت عناصر مهمة من جسمك مش سهل تعوضها.
ويالنسبة لدايت المياه، اللي بيكون شبه تنقية للجسم، فده بيكون بنسبة كبيرة للناس اللي بتعاني من أمراض معينة ومحتاجة للنظام الغذائي ده، هنشرح ده بالتفصيل في المقال الجاي.