فيضان السودان كان بمثابة كارثة بكل ما تحمله الكلمة من معني علي أهله. فراح ضحية الفيضان أكتر من 100 شخص، وخسرت مئات الأسر بيوتها، ده غير الشوارع اللي غرقت واتدمرت تمامًا. وبالرغم من الظروف القاسية اللي بيمر بيها أهالي السودان، إلا إن طيبة قلبهم هيا اللي طغت علي المشهد.
في لفتة إنسانية جميلة، فتحت السيدة السودانية سارة بشير أبواب بيتها لكل الأسر اللي فقدوا بيوتهم بسبب الفيضان. وبيتها نفسه كان تضرر ولكن كانت أضرار بسيطة قدر والدها وأخوها انهم يرمموها بسرعة، ومن بعدها اتصلت سارة بأقاربها وأصدقائها اللي هُدمت بيوتهم بعد الفيضان وعرضت عليهم مباشرة إنها تستضيفهم في بيتها.
وبالفعل نفذت سارة كلمها واستضافت عشر أسر ووفرتلهم الأكل والشرب وكل اللي يلزمهم، وكمان قالت إنها مستعدة تستضيف عشر أسر تانيين بصدر رحب وأنها بتزعل لما بعض الأسر بتمشي، لأنها “بتتمني انه بيتها يقدر يحتوي الأسر كلها”.. الأمر اللي خلانا نقف قدام إنسانة نبيلة بمعني الكلمة.
المواقف اللي زي دي بتيجي بمثابة شعاع أمل ودليل إن أوقات الشدة، بالرغم صعوبتها ومأسويتها، بتبين معادن الناس الأصيلة وبتثبتلنا إن الإنسانية والرحمة هما أكبر سلاح نواجه بيه الصعوبات مع بعض.