كل يوم بنلاقي مجموعة من التويتات عن موضوع معين بتغزوا موقع تويتر، فبنلاقي الهاشتاج بقى تريندج في يوم وليلة حرفيًا، سواء كان الموضوع جاد، أو حتى لو على حلقة من برنامج إذاعي الناس اتفرجت عليه.. والمرة دي واحد من أكتر الهاشتاجات تريندينج هو #أكثر ما يخيف النساء اللي بالمناسبة مش بس الستات هما اللي اتكلموا فيه عن أكتر الحاجات اللي بيخافوا منها، ولكن الرجالة كان ليهم دور هما كمان في التعبير عن رأيهم.. ففي اللي اتكلم في مواضيع بجد زيّ خوفهم من الجواز الفاشل، وفيه اللي خدها بهزار زيّ خوفهم من الحشرات، وفي اللي جاوب الإجابة النموذجية.. الستات مابتخافش من حاجة!
مخاوف حقيقية
من بين كل المواضيع اللي ممكن تقلق الستات وتخوفهم، جزء العلاقات كان العنصر المشترك والرئيسي بين معظم اللي جاوبوا على سؤال الهاشتاج.. فشوفنا كتير من التويتات محتواها إن الست بتخاف من إهمال جوزها ليها، من فكرة تغيير الأشخاص بعد التعود عليهم، وفقد أشخاص عزيزة عليهم سواء بموتهم أو انفصالهم، فنقدر نقول إنهم بيخافوا من غدر الرجال عمومًا.. والأهم من ده كله، إنها بتخاف تبقى عايشة حياة مش مبسوطة فيها أو راضية عنها.. وفي ستات تانية عبروا عن خوفهم من الارتباط والإنجاب، دا جنب الخوف من العلاقات، كمان اتكلم البعض عن خوفهم من حوادث تحرش وقتل الفتيات.
هزار
أما بالنسبة للتويتات المضحكة، فطبعًا إحنا مانتوصاش في الحتة دي! ففي اللي قال إن الحشرات أو الصراصير بالتحديد بتخوفهم أكتر من أي مشاكل تانية ممكن تواجهها مع الراجل، وفي اللي اتكلم عن زيادة الوزن ورعب وقت الوقوف على الميزان، وفي كمان اللي اتكلم عن مشاكل العلاقات زيّ تعدد الزوجات بس بشكل ساخر.
إيه.. ستات بتخاف؟
ستات مين دول اللي يخافوا، ماعندناش إحنا الكلام ده! تناول كتير من الستات الموضوع من الناحية دي، وإن الستات بتشيل أحمال كتير وبتعدي بكل حاجة، فمن الآخر هي مفيش حاجة تقدر تخوفها! مش صح الكلام ولا إيه؟