ميكس “بلادي بلادي” و”إسلمي يا مصر” لمبادرة اتكلم عربي

بمشاركة المصريين بالخارج، والموزع الموسيقي ستيفن سيمون، والمغنية الأوبرالية المصرية إيمي فريجه، تم إطلاق أغنية مبادرة “اتكلم عربي” اللي بتشجع المصريين إنهم يفتخروا بلغتهم، الأوبريت الغنائي الجماعي ميكس بين النشيد الوطني المصري “بلادي بلادي” والأغنية الوطنية “إسلمي يا مصر” بطريقة جديدة قدروا من خلالها يعززوا معني الانتماء، وحققوا نجاح كبير على السوشيال ميديا، والسفيرة نبيلة مكرم، وزيرة الدولة لشئون الهجرة والمصريين بالخارج، شكرت اللي قدموا الأوبريت وعبرت عن إعجابها بيه.

من 6 مدن مختلفة حول العالم، شباب مغنيين مصريين قدروا يعملوا شكل جديد من الأغاني الوطنية أو “الأوبريت” بشكل جديد غير اللي اتعودنا عليه، بمشاركة موزع موسيقي عالمي قدر يحقق ده، وصوت أوبرالي يضيف لمسة مختلفة على الأوبريت، اللي بيعبر عن المبادرة وهدفها، ومن خلال الأوبريت، صرحت السفيرة نبيلة مكرم إنه هيتم إعداد الأغنية الرسمية للمبادرة على أساس نجاح الأوبريت، اللي أهدى كلماتها الدكتور مدحت العدل للمبادرة، وهيقوم بغنائها الشباب اللي عملوا الأوبريت، لإن عندهم قدرات فنية مبدعة وانسجام فني كبير.

اتكلم عربي

Posted by ‎اتكلم عربي‎ on Sunday, December 27, 2020

مبادرة “اتكلم عربي” أطلقتها وزارة الهجرة للحفاظ على الهوية المصرية، من خلال أهم حاجة بتحافظ على الهوية وهي اللغة، ولربط المصريين بالخارج بوطنهم الأم وترسيخ الهوية المصرية جواهم مهما كانوا في ثقافات وحضارات مختلفة، خصوصًا جيل الشباب، لمواجهة حرب طمس الهوية، ولإن الشباب بالذات اللي بيكبروا برا البلد، محتاجين اللي يتواصل معاهم علشان ينمي عندهم القيم والثقافة والإنتماء لوطنهم.

آخر كلمة: ماتفوتوش قراءة: تعرف إن الأرقام الإنجليزية أصلها عربي؟ دي القصة ورا الموضوع.

تعليقات
Loading...