أبطال مجهولة: سيدات عرب ضمن قائمة BBC لأكثر النساء تأثيرًا في العالم 2020

رغم إن في سيدات كتير سواء ست البيت أو المرأة العاملة، بيضحوا وبيأثروا في حياة الناس والمجتمع دايمًا، ولكن السنادي كانت مختلفة بكل المقاييس، ومواقف كتير شوفنا فيها عنف واضح ضد المرأة. ومع وجود تحديات كبيرة ومجتمعة في وقت واحد زيّ دي.. قوة المرأة، وكمان تأثيرها ظهر أكتر وأكتر.. وفي قائمة عملتها BBC لأكتر سيدات تأثيرًا في سنة 2020، تعالوا نشوف بعض من السيدات العرب اللي خدوا مكان في القايمة دي.

نادين أشرف – مصر

ظاهرة التحرش اللي بيعاني منها الستات المصرية بشكل خاص، بقت مشكلة الكل بيحاول يحطلها حد.. ورغم صغر سن نادين، ولكنها قدرت إنها تغير حياة كتير من البنات للأحسن وتجيب حقهم لما عملت صفحة “assault police” على انستجرام، واللي من خلالها بيقدروا البنات بشكل سري إنهم يتكلموا عن المتحرشين اللي بيعانوا منهم ويبلغوا عنهم علشان يكون ده رادع للرجال المتحرشين في مصر.. وبرغم التهديدات والمشاكل اللي حصلتلها بسبب الصفحة، ولكن هي لسه مكملة، وبتدافع عن حقوق البنات وبتهاجم أي متحرش.

إلواد إلمان – الصومال

ناشطة صومالية بتسعى من صغرها إنها تحقق السلام في الصومال، ومقالة واحدة مش هتكفي إننا نسرد كل اللي عملته من أعمال مؤثرة.. فهي ساعدت في تأسيس أول مركز لأزمة الاغتصاب، وتولت منصب مستشارة الأمين العام للأمم المتحدة، وساهمت في إنشاء برنامج عمل الشباب لمكافحة التطرف العنيف، وكمان مديرة البرامج والتنمية في مركز إلمان للسلام وحقوق الإنسان اللي بيهدف لإنهاء الصراع بين المجتمعات المحلية.

سارة الأميري – الإمارات العربية المتحدة

سارة بنت يوسف الأميري هي وزيرة دولة للتكنولوجيا ورئيسة وكالة الإمارات للفضاء.. دخلت في القائمة دي علشان تأثيرها الواضح في مجال “المعرفة”، وهي قائدة الفريق العلمي لمشروع مسبار الأمل اللي أُرسل لاستكشاف المريخ. واللي بيعتبر أول من سيكتشف المريخ من بلد عربي، واللي متوقع إنه يوصل للمريخ في شهر فبراير 2021.

نسرين علوان – العراق

هي أستاذة مشاركة للصحة العامة في جامعة ساوثهامبتون في المملكة المتحدة.. وبتعمل بحوث في مجال صحة المرأة والأطفال، وبعد تفشي وباء كورونا، ركزت على دراسة المرض أكتر وأهمية دراسة الأمراض طويلة الأمد اللي تسبب فيها الفيروس، فالأشخاص اللي أصيبوا بكوفيد-19، بلّغوا عن أعراض من ضمنها الشعور بالتعب والصداع وضيق التنفس.

ماجي جبران – مصر

هي سيدة مصرية مسيحية أرثوذكسية، وهي المؤسس ورئيس المكتب التنفيذي لجمعية Stephen’s Children الخيرية في القاهرة.. وكرست الأم ماجي حياتها للاهتمام بالأطفال المسيحيين، والمسلمين، وتوفير الدعم النفسي والمادي ليهم، من عام 1989 ولحد دلوقتي، وده غير حياة آلاف الأطفال.

وعد الخطيب – سوريا

ناشطة سورية وصحفية ومصورة ومخرجة، وأنتجت وعد فيلمها الوثائقي “من أجل سما” سنة 2019، واللي اترشح لأربعة جوائز بافتا في حفل توزيع جوايز الأكاديمية البريطانية السينمائية الـ 73 وفاز بجايزة أفضل فيلم وثائقي، وكمان اترشح لجايزة أوسكار.

آخر كلمة: فخورين بكل ست عربية قدرت تبقى صاحبة تأثير على العالم في سنة صعبة زيّ دي!

تعليقات
Loading...