أسئلة لازم تبقى مستعد لها في لمة العيد

كلها أيام وتهل علينا الأعياد، عيد القيامة المجيد وعيد شم النسيم وعيد الفطر، والعيد طبعًا معروف باللمة ولمة يعني عيلة، وعيلة يعني احتمال تقابل ناس مش هتبقى حابب تشوفهم وكان أخر معرفتك بيهم السنة اللي فاتت في العيد برضه، ودايمًا بيبقوا جايين ومحضرين ليستة أسئلة بيسألوها بتعدي على كل أفراد العيلة، واحنا هنا حبينا نوجب معاك ونفكرك بالأسئلة دي علشان تبقى مستعد لها.

مش فاكراني؟

ده أنا كنت مع ماما في المدرسة.. يا طنط دي ماما نفسها مش فاكراكي أنا هفتكرك ازاي؟ أو لما تقولك ده أنا بنت عمة خالة مامتك.. ها افتكرتيني بقى؟ بتقولك على صلة قرابة أبعد من أسوان أساسًا وتقولك ازاي مافتكرتنيش؟ ياطنط والله أنا فاكرة طريق بيتنا بالعافية.

اشتغلتي ولا لسه؟

أنا مش مديونة ليكم ولا عليا أقساط عايزة أسددها علشان كل واحد يشوفني يقولي اشتغلتي ولا لسه، يهمك في إيه اشتغلت ولا لأ؟ الشخص يقرر إنه يشتغل لما يلاقي حاجة مناسبة له، مش لازم يشتغل علشان يبقى اسمه بيشتغل، ولا إيه؟

إيه ده إنتي تخنتي/ رفعتي كده ليه؟

إنتي تخنتي أوي، أو المقابل لها “هما بياكلوا أكلك؟”هو أنا باجي أكل من تلاجتكم يا طنط؟ ما أكل براحتي، تخنت ولا رفعت ده مأزم على حياتكم في إيه؟ مادام أنا راضية على نفسي وشكلي، إيه المشكلة؟

مافيش حاجة جاية في السكة؟

لأ مافيش ولو فيه مش هنقولك، ها إيه تاني؟ أو “الحقوا هاتوا لكوا عيل قبل ما تكبروا” هو مين المفروض يقرر حاجة زيّ دي؟ الزوجين ولا الأهل والعيلة؟ كل واحد شايف الوقت المناسب له، وشايف هيبقى جاهز نفسيًا وماديًا امتى.

إنتي بقيتي في سنة كام يا حبيبتي؟

يا طنط أنا عديت كل المراحل التعليمية الحمدلله ونجحت فيها، واتخرجت من الجامعة واشتغلت وإنتي لسه بتسأليني إنتي في سنة كام؟

وبتقبضي كام على كده؟

واحد من الأسئلة المحرجة برضه لسببين، الأول إنك مش عايز حد يعرف وده أمر طبيعي ومن حقك، والسبب التاني لو أنت كنت بتقبض ملاليم فتتكسف تقول بتاخد كام، وبتبدأ تلجلج في الكلام وتعرق من كتر ما أنت مكسوف من الرقم اللي بتاخده، وفي الأخر هتقوله أنا بقبض باليومية وأنا بشتغل علشان أتعلم مش علشان أكسب.

هنفرح بيكي امتى؟

أول سؤال بيتسأل من قبل حتى أزيك عاملة إيه.. هنفرح بيكي امتى؟ والله يا طنط أنا فرحانة بنفسي ومبسوطة بها أوي، نعمل فرح مخصوص علشان نفرح بها كل الناس اللي نفسها تفرح؟ معقول فرحتكم قايمة بيا أنا بس؟ هتجوز وقت ما أتجوز هو عرض كومبو لازم ألحقه قبل ما يخلص ولا إيه؟

آخر كلمة: ماتفوتوش قراءة: “ماتخلينيش أفطر عليك”: حاجات ماينفعش نعملها في الصيام