تبنت دائرة الصحة في أبو ظبي نموذج “الصحة المجتمعية” علشان تبقى الجهة الصحية التنظيمية الأولى في المنطقة والتانية على مستوى العالم اللي بتتبنى النموذج الرقمي ده بعد هيئة الخدمات الصحية التنظيمية NHS وبالشراكة مع شركة الأدوية السويسرية “نوفارتيس”، طب إيه هو نموذج الصحة المجتمعية ده؟
النموذج ده مسئول في الكشف المبكر عن أمراض القلب والأوعية الدموية وإدارتها وتعزيز الوقاية منها بين أفراد المجتمع، وده من خلال توفير بيانات يقدر من خلالها المختصين في مجال الرعاية إنهم يقدموا للمرضى برامج وتوصيات تقلل من فرص الإصابة بالمرض. غير إنه بيعمل برامج يعالج بها المرضى، لأ ده كمان وقائي لإنه بيكشف من خلال قاعدة البيانات عن الأفراد اللي أكتر عرضة للإصابة بالمرض وإحتمالية إصابتهم عالية خصوصًا لو كان في تاريخ مرضي في العيلة. ومن خلال البرامج الوقائية دي بيقدم حلول وخطط علاجية تبقى قابلة إنها تتنفذ على أكتر من مريض.
أمراض القلب والأوعية سبب رئيسي من أسباب الوفاة، وثلث الوفيات لأشخاص أعمارها أقل من 60 و70 سنة، ده غير المريض بها للأسف بيعيش حياة مش طبيعية بسببها وبتمنعه من ممارسة أنشطة كتير، علشان كده كان لازم تبقى من ضمن الأولويات لأي منظمة صحية عايزة تستثمر في مواطنيها بشكل صح.