وراء كل عمل عظيم امرأة: أبرز النساء المشاركة في حفل نقل المومياوات الملكية

من أجمل الحاجات اللي شوفناها امبارح في حفل نقل المومياوات، هي وجود نماذج كتيرة وعظيمة من المرأة العربية، اللي أبدعوا في الحفل وكانوا سبب أساسي لنجاحه وإنه يبقى بالشكل المبهر ده اللي العالم كله وقف قدامه عاجز عن وصف الحدث التاريخي ده. وعلشان ندي الستات العظيمة دول حقهم والتقدير اللي يستحقوه، حبينا نتكلم عنهم هنا، اعتزازًا بيهم وبدورهم في هذا الحدث التاريخي..

جاسمين طه

عن: Trendsmap

جاسمين طه ابنة العميد طه زكي، وزير الصناعة والثروة المعدنية السابق، واللي شاركت في تقديم كتير من البرامج الإعلامية زيّ مهرجان الموسيقى العربية ومهرجان القاهرة السينمائي الدولي، وكانت إحدى مقدمات الحفل، واختارت فستان بتطريز وطابع فرعوني وبإطلالة تليق بتقديم حدث كبير زيّ نقل المومياوات الملكية.

رضوى البحيري

عازفة آلة التمباني ومن ضمن أوركسترا أوبرا القاهرة اللي لفت أنظار جزء كبير من الجمهور لموهبتها الكبيرة في العزف، فشوفنا بوستات كتير بتخصها هي بالذات كواحدة من “highlights” الحفل الغنائي.

ريهام عبدالحكيم

شاركت المطربة المصرية ريهام عبدالحكيم في حفل انطلاق الموكب، وأطربت الكل بصوتها.. وقالت ريهام في مداخلة تلفونية “الحدث ضخم جدًا جدًا، وحاجة مشرفة لمصر وهذه الحفلة صعب تكرارها مرة أخرى.. وأتمنى تكرارها”.

ناردين فرج

المذيعة ناردين فرج هي كمان كانت من مقدمي الحفل، وقدت الحفل بكل احترافية ورقي مناسب لتمثيل مصر في الحدث الكبير ده، وقالت إن مشاركتها في تقديم احتفالية موكب المومياوات الملكية فخر ليها ولمشوارها الإعلامي.. وإن حقيقي بلدنا عظيمة وصاحبة تاريخ وحضارة عظيمة.

السوبرانو أميرة سليم

السوبرانو أميرة سليم مغنية أوبرا عالمية قدمت فقرة غنائية مبهرة ضمن فعاليات انطلاق موكب المومياوات الملكية، وعلق الكتير على صوتها الرائع وموهبتها الكبيرة وكمان حضورها اللي أضاف كتير للفقرة الغنائية.

آية الغرياني

آية الغرياني شاركت في تقديم وتغطية الحفل، وقالت إن مصر والتاريخ “توأمان متماثلان في كل حاجة”، فمصر مهد الحضارات، وفي مصر ولدت الحضارة البشرية من آلاف السنين.

نسمة محجوب

نجمة برنامج ستار أكاديمي المطربة نسمة محجوب، قدمت فقرة غنائية في حفل نقل المومياوات، وقالت إن الملحن هشام نزيه هو اللي عرض عليها فكرة تقديم أغنية ضمن الاحتفالية، وفعلًا كانت فقرتها مميزة واستمتع الكل بصوتها.

سلمى سرور

سلمى عازفة كمان من الطفولة، وعندها دلوقتي 18 سنة بس، وقدرت بموهبتها إن يبقى ليها مكان للمشاركة في حدث ضخم زيّ حفل نقل المومياوات.. وفعلًا أبدعت في العزف خلال الفقرة الموسيقية.

نيللي كريم

يسرا

هند صبري

منى زكي

شارك مجموعة كبيرة من الفنانات الكبار من مصر والوطن العربي في الحفل، وكلهم ظهروا بفساتين واكسسوارات على الطراز الفرعوني وكان وجود كل واحدة فيهم مميز وإضافة للاحتفال كله.

آخر كلمة: فخورين بكل الستات اللي شاركت في عمل عظيم زيّ ده!

تعليقات
Loading...
Tweet
Share
Share
Pin