والعيد داخل علينا، إزاي تقدروا تقضوا وقت سعيد بأقل زيادة في الوزن؟

بواسطة منة حسني.

اللحوم ومأكولات عيد الأضحى اللي كل أُسرة بتتسابق على الإبداع فيها، وفي أصنافها، للأسف دسمة بشكل كبير، ومليانة بالسعرات الحرارية والدهون اللي بتسبب زيادة في الوزن، ومشاكل صحية كتيرة خلال أيام العيد. إحنا لو اتبعنا نظام غذائي متوازن في العيد، ونفذنا بعض النصائح الصحية البسيطة، هنقدر نستمتع بالعيد وناكل كل اللي نفسنا فيه، ودي مجموعة من النصائح اللي ممكن تفيدكم مع أكلات العيد.

تقليل كمية الأكل

ببساطة تقليل كمية الأكل اللي مليان دهون، ونشويات زي الفتة والرقاق، والتركيز علي عدم ملئ الطبق على الأخر، وإضافة الخضروات لوجباتنا الأساسية ممكن ينقذنا من مشاكل صحية كتيرة، وألام المعدة بعد الانتهاء من ولائم العيد.

استبدال طرق الطبخ

استبدال السمن بالزبدة البلدي، أو زيت الزيتون بيقلل من السعرات الحرارية في الأكل، وعدم تسبيك الأكل بزياده بيساعد على تسهيل عملية الهضم وبيريح المعدة، واستبدال المقليات بكمية صغيرة من المشاوي، اللي بتكون برضه لذيذة الطعم، بيساهم في تقليل احتمالية زيادة الوزن في العيد.

وكمان تجميع الدهون المتساقطة على الفحم أثناء الشوي حاجة مهمة جدًا، علشان نقدر نمنع تَرَسُبها علي اللحمة مرة تانية بسبب الدخان، أما إزالة الدهون من علي اللحمة قبل أكلها، وتصغير قطع اللحمة أثناء تقطيعها هيساعد في أكل كميات أقل، وإضافة الخضراوات جنبها زي البازلاء، والبروكلي، والبقدونس، والجرجير هيساعد الجسم على امتصاص الدهون اللي موجودة فيها بسهولة.

نوع اللحمة

طبعـاً مفييش شك إن نوع اللحمة بيفرق في درجة دسامتها، فاللحمة الضاني مثلاً هي أكتر أنواع اللحوم دسامة، وأستبدال اللحم الضاني بالبقري هيساهم في تقليل الدهون اللي بناكلها، ولازم ناخد بالنا إن في أجزاء من البقرة دسمة جدًا، و أجزاء تانية أقل دسامة فمثلاً اللحمة البتلو أقل دسامة من الكندوز، والكتف والظهر في البقرة هما الأجزاء الأقل دسامة فيها، وبالتالي ممكن نركز أكل على الأجزاء دي بس في العيد ده.

الحركة

النشاط، والحركة، ولو لنص ساعة يوميًا خلال فترة العيد هيساعد علي حرق كميات كبيرة من الأكل اللي بناكله بسهولة، وهيحسن من نشاط الدورة الدموية، و كفاءة عملية الهضم والنوم، وكمان هيكمل احساسنا بالسعادة في فترة العيد لأن الرياضة ليها دور أساسي في التأثير على مزاجنا، وسعادتنا، و نشاطنا في حياتنا اليومية.

آخر كلمة: لو وزنكم زاد في العيد، متقلقوش شوفوا ست خدع مفيدة لخسارة الوزن اللي زيدناه في الفترة اللي فاتت، واستمتعوا بأسلوب حياة صحي ومليان نشاط.

تعليقات
Loading...
Tweet
Share
Share
Pin