نجمة البوب العالمية كيلي كلاركسون نزلت أخر أغنية ليها بالعربي!

مغنية البوب الأمريكية كيلي كلاركسون نزلت أغنيتها الجديدة “I Dare You” يوم الخميس اللي فات، والمفاجأة إنها نزلت نسخة من الأغنية بتغني فيها بالعربي المغربي. “كنتحداك” -النسخة العربية من الأغنية- كيلي بتغني مع الفنانة المغربية فوزية.

بالإضافة للعربي والإنجليزي الأغنية نزلت بـ 3 نسخ كمان باللغات الألمانية والفرنسية والعبرية. كيلي وضحت على برنامجها “برنامج كيلي كلاركسون” على التلفزيون الأمريكي إن المشروع كان صعب جدًا لكنها كانت شغوفة بيه لإنها كبرت في بيئة مليانة لغات مختلفة و خلفيات مختلفة. وبعد ما عرضت الأغنية لأول مرة على البرنامج، كيلي كشفت إن المشروع كان هيتأجل بسبب الأزمة اللي بيمر بيها العالم في الوقت الحاليّ، لكن بعد تفكير طويل، هي والطاقم اللي معاها أدركوا إن ده أحسن وقت ينشروا فيه العَمل ده خصوصًا والعالم كله بيمر بالظرف الصعب ده، فالبنسبالهم الأغنية رسالة أمل في وقت كلنا فاقدين فيه الأمل.

بالنسبة للجزء اللي كيلي غنته في الأغنية فالعربي بتاعها مش بطال، هي تمكنت من إنها تستخدم كلمات قدرت تغنيها من غير ما تأثر على صوتها القويّ اللي هي مشهورة بيها، بس تقدروا تتفرجوا وتحكموا بنفسكوا في اللينك اللي تحت.

أخر كلمة: إيه رأيكم في العربي بتاع كيلي؟ تقدروا تعرفونا في الكومنتس.

تعليقات
Loading...
Tweet
Share
Share
Pin