من القناص لأنا وأخي: أغاني سبيستون اللي عايشة معانا لحد دلوقتي

عامل رئيسي ومهم في نجاح المسلسلات هي التترات بتاعتها، وكمان الكارتون عامل رئيسي لنجاحهم هو أغانيهم، وده اللي فعلًا حصل لجيلنا اللي اتعلق بالأغاني اللي اتعودنا نسمعها واحنا صغيرين في الكارتون المفضل لنا، ومعظمنا بنعتبر سبيستون جزء مهم في طفولتنا، وفعلًا “تخيل أن الكون لا طعم له أو لون، أو أن التليفزيون من غير سبيستون؟ هذا محال!”

تعالوا نفتكر أحلى أغاني بنحبها على سبيستون ولسه لحد دلوقتي لما بنسمعها بنحس بدفا، وبنرجع لذكريات طفولتنا في ثانية.

عن: Youtube

القناص

من أشهر الأغاني اللي لو اشتغلت دلوقتي جيل كامل هيعدي قدامه ذكريات طفولته، “من هو الصامد المغامر في وجه السيل” بصوت رشا رزق والقصص اللي شوفناها في القناص كانت صديقة لطفولتنا.

المحقق كونان

مين في جيلنا ماتابعش مناوشات كونان والمحقق توجوموري؟ أي وقت هتيجي قدامك أغنية المحقق كونان هتفتكر على الأقل قضية واحدة بكل تفاصيلها، حلّها أعظم محقق شوفناه في طفولتنا.

أنا وأخي

“لا تنسى أخاك.. ترعاه يداك” أكيد لما سمعتها بصيت لإخواتك، حتى لو في وسط خناقة على لعب، وحسيت قد إيه أنت بتحبهم، ولحد دلوقتي لما بتسمعها بتحس بقوة الحب الغير مشروط بينك وبين إخواتك وعلاقتكم اللي عمرها ما تتأثر.

بائعة الكبريت

مع إنها بائسة، بس كنا بنحبها ولسه لحد دلوقتي لما بنسمعها بنتأثر كإننا أطفال، كنا بنبقى عايزين نساعدها ومش عارفين ازاي.

سابق ولاحق

اللي أكدت لنا إن لا يُهزم أبدًا من سعى، زي ما عماد أكد لنا بالظبط. معظمنا في طفولتنا جاب عربيات سابق ولاحق وطبّق عليها اللي بنشوفه في الحلقات.

كابتن ماجد

عاد إليكم من جديد! كنا بنتمنى نشوفه بيجيب جون قبل ما احنا يجيلنا شلل، بس برضه بنحبه.

هامتارو

هل تعرفون من هو هامتارو؟ أكيد! حتى لو ماكنتش بتتابع الحلقات نفسها، أكيد هتلاقي نفسك حافظ الأغنية.


بات مان

“ضوء لمع وسط المدينة”، كلنا كنا بنتابعه واحنا صغيرين، وواحنا كبار كمان الحقيقة.

هزيم الرعد

يمكن مش في نفس الحقبة الزمنية لباقي الأغاني اللي في القائمة، بس كان له شهرة كبيرة، وحتى لو مش عارفه أكيد سمعت الأغنية قبل كده.

بابار

عائلة أفيال لذيذة ودمها خفيف وكنا بنحبها واحنا صغيرين، والأغنية تعتبر من العلامات المميزة في طفولتنا.

أدغال الديجيتال

جواد وهالة وسكر وصخر، شخصيات عيشنا معاهم مغامرات كتير واحنا صغيرين، والأغنية بصوت رشا رزق كانت بتحمسنا في كل حلقة للمغامرة الجديدة.

آخر كلمة: ماتفوتوش قراءة: رحلة نوستالجيا: كارتونات مدبلجة بالعربي اتربينا عليها في طفولتنا

تعليقات
Loading...
Tweet
Share
Share
Pin