ظهرت الفنانة سماح أنور على برنامج It’s Show Time على قناة الـ CBC مع الإعلامية هبة الأباصيري، واتكلمت على حقيقة ابنها أدهم، وقالت إنها كانت مخبية حقيقته بسبب أهلها اللي طلبوا منها ماتعلنش عن جوازها ولا ابنها علشان كانوا شاكين إن العلاقة مش هتكمل وده فعلًا اللي حصل، فهي وجوزها اتطلقوا بعد اكتشاف خيانته، وكانت حاسة إنها بتظلم ابنها معاها ولكنها كانت بتحاول ترضي أهلها وكانت بتقول إنها كانت متبنياه.
ولكنها في يوم من الأيام وهي ضيفة في برنامج الإعلامي محمود سعد، قررت إنها تعلن عن الحقيقة وقالت إن أدهم بيكون ابنها الحقيقي وإنها مش متبنياه، وده كان بسبب إنها زهقت واتخنقت من إنها مخبية الحقيقة.
وكمان سماح أنور اتكلمت عن حبها للرجال الكبار بسبب إنها مابتلاقيش حد زيها أو شبهها في الرجالة اللي في سنها، وكمان قالت إن السن في العلاقات مش هو الأساس ولكن الدماغ هي اللي بتتحكم في نجاح الحاجات دي، ورغم إنها اتجوزت راجل في سنها وأكدت إنها كانت بتستلطفه وبتحبه وإن في بينهم علاقة صداقة نادرة جدًا، وإن هو كان بيحبها أكتر منها، بس قالت إنها مابتعرفش تتكلم مع حد أو تلاقيه مثير للاهتمام إلا ولو كان كبير في السن.