سرطان الثدي من أكتر أنواع السرطان انتشارًا، وممكن ييجي للسيدات والرجال، لكنه منتشر في السيدات أكتر بكتير.
نسب شفاء سرطان الثدي عالية جدًا، خصوصًا لما نكتشفه بدري، لدرجة ممكن توصل لـ 99%، مقارنًة بنسبة شفاء توصل لـ 27% في مراحله المتأخرة جدًا.
علشان كده، قررنا النهارده نقدملك دليل شامل لكل حاجة لها علاقة بسرطان الثدي، إيه أعراضه؟ ازاي تكتشفيها؟ امتى تروحي للدكتور؟ كمان هنقولك تروحي فين لو لقيتي عندك أي عرض من أعراضه، أو حتى علشان تطمني على نفسك بس.
أعراض سرطان الثدي
أكتر علامة منتشرة على سرطان الثدي هي وجود كتلة في منطقة الثدي أو الإبط، بس في علامات تانية برضه مهم ناخد بالنا منها:
- ظهور كتلة شبه بذرة الليمون، صلبة، ومابتتحركش، ومابتوجعش.
- ألم في الثدي.
- احمرار في جلد الثدي أو بهتان.
- تورم أو تهيج في الثدي كله أو جزء منه.
- إفرازات من الحلمة.
- إفرازات دموية.
- تقشر الجلد.
- تغير في حجم الثدي، أو إن يظهر واحد منهم أكبر من التاني، لو ده مش الطبيعي بتاعه من الأول.
- الحلمة المقلوبة.
لو ظهرت حاجة من العلامات دي، مش معناه بالضرورة إنه سرطان، لكن مافيش شك إن الكشف والتحليل مهم علشان تطمني.
ازاي تكتشفي سرطان الثدي
زي ما قولنا في المقدمة، الاكتشاف المبكر ممكن يخلي نسبة الشفاء توصل لـ 99%.
فاحنا بننصح السيدات في كل الأعمار، خصوصًا لو عندهم تاريخ مرضي في العيلة، يعملوا فحص شهري في البيت.
علشان تعملي الفحص، اقفي بأوضاع مختلفة زيّ اللي في الصورة، وافحصي منطقة الثدي والإبط بإيدك، بضغطة خفيفة بعدين متوسطة، وبعدين زودي الضغط شوية، ودوري على واحدة من العلامات اللي ذكرناها فوق.
اعملي الفحص ده في موعد ثابت كل شهر، ويفضل تعمليه بعد ما الدورة الشهرية تخلص.
السيدات اللي سنهم فوق 40 سنة، الأفضل إنهم يعملوا فحص Mammogram كل سنة حتى لو مافيش أعراض! ليه؟ علشان مش دايمًا بتظهر أعراض في الأول، والكشف ده هيخلينا نكتشفه بدري ونقاومه بسهولة قبل ما ينتشر.
الـ Mammogram ده النوع المنتشر أكتر من فحص سرطان الثدي، والنوع التاني هو الموجات فوق الصوتية.
لو الدكتور شك في وجود ورم في الأشعة، ساعتها هيطلب تحليل عينة، وده اللي هيجزم بوجود ورم من عدمه.
تروحي تكشفي فين؟
مبادرة صحة المرأة (100 مليون صحة)
بتدخلي على الموقع علشان تشوفي أقرب مركز كشف ليكي، والكشف كله مجانًا.
مركز صحة المرأة بمعهد ناصر
في معهد ناصر، وفي الدور السادس بالتحديد، وحدة مخصصة لصحة المرأة، هتروحي تقعدي يوم كامل في غرفة لوحدك، وتعملي 14 نوع من التحاليل والفحوصات علشان تطمني على صحتك بشكل عام، منهم طبعًا كشف مبكر عن سرطان الثدي.
مستشفى بهية
مستشفى بهية مكانها في الهرم، والكشف فيها مجانًا لإنها مستشفى غير هادفة للربح، بس محتاجة تحجزي موعد قبلها.
المعهد القومي للأورام
الكشف في المعهد القومي للأورام بمقابل رمزي، والعلاج مجاني لكل الفئات والأعمار.
عنوانه: 1 شارع القصر العيني – ميدان فم الخليج – القاهرة.
السرطان في الفترة الأخيرة بقى زي أي مرض، له علاج سهل ومتوفر، لكن الأهم إننا نكتشفه بدري ومانتجاهلش أي علامات تظهر لنا، لإن التأخير ممكن يكلفنا أكتر مما نتخيل.