لو بتحب السفر لوحدك، النصائح دي معمولة ليك!

0

بواسطة ميرهان ياسر.

لو إنتم من مجانين السفر والمغامرة، وعايزين تحققوا أكبر قدر من الراحة والاستمتاع خلال سفريتكم، أو حتى لو كنتم معندكمش خبرة في الموضوع وخايفين تجربوا، فإحنا بنقترح عليكم إنكم تجيبوا حاجة تشربوها وتركزوا معانا، علشان إحنا جمعنالكم هنا مجموعة من أفضل النصائح الخاصة بالسفر المنفرد والـ Backpacking.

وللى مايعرفش الـ Backpacking، هو شكل من أشكال السفر المستقل منخفض التكلفة، وغالبًا بتكون الإقامة في مساكن رخيصة الثمن، والشخص المسافر بيكون كل اللي معاه هو حقيبة الظهر الخاصة بيه، وبيحط فيها كل ممتلكاته الضرورية.

خلى شنطك خفيفة

بواسطة: Unsplash.com

على الرغم من إنها حاجة واضحة، بس الغريب إنه بيتم التغاضي عنها من أى حد مبتدئ. وغالبًا بيمشوا ورا طريقة “هاخدها معايا احتياطى” وينتهي بيهم الموضوع بحاجات كثير عاملة زحمة ووزن زيادة على الفاضي. لما تحضروا الشنطة، إسألوا نفسكم: “هل أنا فعلا محتاج ده؟” لو الجواب لأ، اتخلصوا منه قبل ما تبدأوا رحلتكم. ولازم تعملوا تجربة سريعة لاختبار وزن الشنطة، وجربوا تجروا طالع ونازل على السلالم كذا مرة، وده هيديكم إشارة كويسة تتصرفوا على أساسها.

لازم يكون في توازن بين العفوية والتخطيط

بواسطة: Unsplash.com

حاجة من الحاجات الرائعة فى الـ Backpacking هي التلقائية، وغالبًا قرارات اللحظة الأخيرة هى اللى بتوديكم أفضل الأماكن، والمحلات، والمطاعم. متخافوش أبدًا إنكم تروحوا الأماكن اللى مش مشهورة بين السياح، أو إنكم تاخدوا قرارات سريعة عشان تروحوا أى مكان، بس دة طبعاً مايمنعش إن التخطيط حاجة مهمة. وقبل ما تسافروا، خلى عندكم فكرة تقريبية عن المسارات التي هتسلكوها، وعن المكان اللى رايحينه بصفة عامة، علشان “ماتتسوحوش!”.

حاولوا توصلوا فى النهار

بواسطة: Pexels.com

خططوا دايماً للوصول بدرى على قد ما تقدروا علشان ماتدورش على طريقكم في بلد غريبة في الظلمة، خاصةً لو مسافرين لوحدكم.

اختلطوا بالمسافرين!

بواسطة: Hikers shop

تواصلوا مع المُسافرين حواليكم علشان تستمتعوا بوقتكم أكتر، فالغرف والنُزُل المشتركة في بيوت الشباب هي من أحسن الأماكن اللي ممكن تقابلوا فيها أصدقاء على المدى القصير، وكمان هتتستفادوا من خبراتهم تاخدوا نصائح ممتازة للسفر المنفرد.

جزمتك، جزمتك، جزمتك.

بواسطة: Unsplash.com

لو انتم فى أحلى مكان فى العالم بس جزمتكم مش مريحة، مستحيل تنبسطوا، وخصوصاً فى الـ Backpacking علشان هتكونوا بتتنقلوا طول الوقت. إلبسوا جزمة رياضية مريحة علشان تسهل الدنيا عليكم!

تعاملوا مع السكان المحليين

بواسطة: Pexels.com

اتعلموا إزاى تتكلموا مع الغرباء، وابتسموا وإبدأوا الكلام، وخليكم فضوليين. متنسوش تسألوا أسئلة مفتوحة مع احترام وتقدير ثقافة الغير علشان الناس دى بتكون دايماً أساس المكان، وهتفيدكم أكتر من أى موقع على النت.

حطوا حاجاتكم المهمة في مكان واحد

بواسطة: Unsplash.com

احتفظوا بأهم اشيائكم في نفس المكان عشان يكونوا دايما فى متناول اليد، وفي أمان. وبالنسبة ليا أنا وأصحابي، جواز السفر، والمحفظة، والكاميرا والموبايل أهم الحاجات اللي دايماً بكون حريصة في التعامل معاهم وبكون حافظة مكانهم كويس.

حافظوا على بطارية موبايلاتكم

بواسطة: Pexels.com

خلوا دايماً معاكم شاحن عشان لو موبايلكم فصل فى أى وقت، وياريت لو شاحن متنقل علشان لو ملقتوش مكان تشحنوا فيه.

وأخيراً، صور كتير أوى!

بواسطة: Unsplash.com

الصور هي أهم ذكريات بنفتكر بيها أي تجربة عزيزة علينا، مابالكم بقى انتم مسافرين لوحدكم؟

آخر كلمة: جربتوا تسافروا لوحدكم قبل كده؟ لو أه قولولنا فى الكومنتات تجربتكم مع السفر المنفرد!

تعليقات
Loading...