كل اللي محتاج تعرفه عن مشاكل البشرة اللي بتسببها الكمامة وطرق علاجها

الكمامة من أهم الإجرائات الاحترازية لمواجهة فيروس كورونا، لكن ارتدائها خصوصًا لوقت كبير بيسبب مشاكل في البشرة زي الإحمرار أو التقشير او حب الشباب وغيرهم، خصوصًا لأصحاب البشرة الحساسة، علشان كده، هنتكلم عن كل المشاكل اللي ممكن تسببها الكمامة للبشرة وإزاي نعالجها بطريقة آمنة وكمان إزاي نهتم ببشرتنا للوقاية من المشاكل دي.

اتكلمنا مع د/ ريم نعمان اخصائية الأمراض الجلدية، وجاوبتنا على الأسئلة اللي بتخص مشاكل البشرة مع الكمامات وكمان ادتنا نصايح لاختيار نوع الكمامة الألطف على البشرة، وإزاي نهتم بالبشرة في الفترة دي.

مشاكل البشرة اللي بتسببها الكمامة

مبديًا مشاكل البشرة من الكمامات بتحصل لو الكمامة القماش مش مصنوعة من القطن الخالص ودخل في صناعتها مواد زي البوليستر، فده هيسبب مشاكل في البشرة زي الإكزيما، الحساسية، أو إحمرار شديد في الجلد، خصوصًا لأصحاب البشرة الحساسة، وكمان ممكن ده يؤدي لظهور حبوب في المنطقة اللي حول الفم والذقن مكان ارتداء الكمامة، الحبوب هتظهر بكثرة للبشرة اللي عندها استعداد لتكوين الحبوب زي البشرة الدهنية، أما البشرة العادية فالحبوب ممكن تظهر لكن بشكل بسيط وغير منتشر.

كمان ممكن تظهر مشاكل زي التهابات أو إحمرار في منطقة خلف الأذن مكان الأستك الخاص بالكمامة، علشان كدة د/ ريم بتنصح بإرتداء الكمامة من النوع اللي بيتربط حول الرقبة والرأس لتجنب المشكلة دي. بالإضافة لمشكلة عدم توحد لون البشرة بين الوجه كله وبين مكان ارتداء الكمامة، خصوصًا لو الشخص بيرتدي الكمامة لوقت طويل وبيتعرض للشمس، أو للي شغلهم بيعتمد على التعرض للحرارة، وده لإن الحرارة بتعمل تأثير زي تأثير الشمس، زي الغمقان في لون الجلد.

طرق معالجتها

بالنسبة لحب الشباب اللي بتسببه الكمامة بيتم معالجته زي حب الشباب العادي، لكن الفرق إننا مبنستخدمش مستحضرات لتقشير البشرة لإنها هتزود المشكلة، وأوقات بنلجأ لاستخدام مضادات حيوية لمعالجة المشكلة لكن طبعًا مع المتابعة مع دكتور متخصص، أما الإحمرار والالتهابات بيستخدم لعلاجهم كريمات مرطبة أو كريمات الحروق، وده لو عايزين حل سريع قبل استشارة الدكتور، لكن مهم بالنسبة للي بيعانوا من حب الشباب إن كريمات الترطيب تكون مكتوب عليها إنها بتصلح للاستعمال مع حب الشباب، ده لإنها بتحتوي على نسبة دهون أقل من المرطبات العادية، لأنه نسبة الدهون العالية بتزود حب الشباب، وبالنسبة للإكزيما بيتم معالجتها باستخدام كريمات متخصصة تحت إشراف الدكتور للحالة علشان يحدد إيه المناسب لكل حالة.

كمان في طريقة ممكن تساعد على الوقاية أو التخفيف من المشاكل دي، وهي الحرص على غسل الوجه باستمرار على مدار اليوم، باستخدام المياة فقط من غير أي مستحضرات، والمياه تكون فاترة، والطريقة دي هتساعد على إزالة الشوائب اللي بتتكون نتيجة ارتداء الكمامة.

احسن نوع للكمامة على البشرة خصوصا القماش

أحسن نوع للكمامة عمومًا للوقاية هو الـ N95، لكن القطن مناسب جدًا خصوصًا إن الأستك الخاص بيها بيكون أعرض من العادي فبيقلل من الإلتهابات خلف الأذن، وكمان لإنها بتتكون من القطن ومواد بسيطة في الصناعة، لكن الكمامة القطن مش أحسن نوع كحماية ووقاية لإنه في جدال على النقطة دي لكن في النهاية الدراسات أثبتت إن الكمامة القطن كافية للحماية بالنسبة للأفراد العاديين غير العاملين في المجال الطبي.

لكن لازم ناخد بالنا من الطريقة الصحيحة لغسل الكمامات القماش، لإن في طرق غلط منتشرة زي إننا نستخدم مستخضرات تنضيف لغسيلهم وده بيسبب التهاب شديد في البشرة، لكن الصح إننا نغسلهم بشامبو أطفال أو أي مستحضرات خالية من المواد الكيماوية، وحرص على غسله يوميًا علشان ميبقاش في أي رواسب أو بكتيريا على الكمامة ونستعملها مرة تانية فتسبب مشاكل.

نصايح للاهتمام بالبشرة مع ارتداء الكمامة

من المهم بالنسبة للبنات والستات، تقليل استخدام المكياج لإن ارتداء الكمامة على المكياج بيزود الاتهابات على الجلد وبيأثر على تنفس الجلد وده بيسبب التقشير وتحسس الجلد وحب الشباب، ونقلل استخدام الكريمات المرطبة التقيلة على البشرة، لكن بردو نحرص على ترطيب البشرة لإنه مهم جدًا لكن لازم ناخد بالنا من نوع الكريم المرطب نفسه.

كمان نحافظ على إننا نخلع الكمامة في أوقات كتير وسط اليوم علشان نسمح لنفسنا بفترة تنفس طبيعي ونسمح لبشرتنا كمان إنها تتنفس، لكن ده لما نكون لوحدنا أو مش في وسط زحمة علشان منعرضش نفسنا لعدوى فيروس كورونا.

آخر كلمة: لازم نحافظ على ارتداء الكمامة للوقاية من فيروس كورونا، لكن برضه نهتم ببشرتنا.

تعليقات
Loading...
Tweet
Share
Share
Pin