قصص دعمتها وجابت حقها السوشيال ميديا في سنة 2021

واحنا بنختم السنة دي وبنستقبل سنة جديدة، حبينا نجمع لكم مجموعة من الحاجات الإيجابية اللي حصلت لنا على مدار السنة اللي فاتت، ومن ضمنها قصص أظهرت قوة السوشيال بشكل إيجابي على الناس، ساندتهم وكانت هي الداعم الأول لهم ولولا هي كانت تقريبًا قصص الناس دي هتخرج من الحكاية مظلومة وماحدش هيسمع عنها حاجة، ولا كان هيجيلهم حقهم!

قصة الطفل رشيد المصاب بضمور العضلات الشوكي

هاشتاج اتصدر كل محركات البحث على السوشيال ميديا لإنقاذ الطفل رشيد المصاب بضمور العضلات الشوكي، وكان علاجه وقتها حقنة تكلفتها 35 مليون جنيه مصري، وده كان طبعًا فوق طاقة أي أسرة إنها تتحمله، فمالقتش الأسرة غير حل السوشيال ميديا إنها توصل صوتها للرئيس عبد الفتاح السيسي إن العلاج يبقى على نفقة الدولة، بس اللي حصل بسبب الحملة كان أكبر من كده، تم فتح حسابين باسم رشيد في البنك CIB والبنك الأهلي وبعد أسابيع قليلة من إنطلاق الحملة قدروا إنهم يجمعوا كل المبلغ المطلوب من التبرعات! وبعدها أطلق الرئيس السيسي مبادرة لعلاج مصابي ضمور العضلات بالمجان.

السوشيال ميديا ساندت بنت اتعرضت للتحرش في المطار

بنت وهي في المطار اكتشفت إن حد كان بيصورها على موبايله، ولما اتأكدت من ده وواجهته راح وزقها وسط الناس علنًا وماعرفتش تاخد حقها! فالبنت مالقتش غير إنها تصور فيديو تحكي فيه وهي منهارة نفسيًا على اللي حصل لها، والسوشيال ميديا أظهرت لها كل الدعم وبدأوا يشيروا الفيديو في كل حتة وكمان معاه صورة المتحرش، لحد ما طلعت البنت تاني في نفس اليوم بعد نص الليل وظهرت فيه بحالة نفسية أحسن وبتشكر كل اللي ساعدوها ووقفوا جانبها وهما مايعرفوهاش، وشرطة المطار ساعدتها وخرج المتحرش من المطار وهو متكتف.

السوشيال ميديا فضحت متحرش طفلة المعادي

حادثة تابعناها كلنا على السوشيال ميديا، وقت لما اتصور شخص ما وهو بيحاول إنه يتحرش بطفلة عمرها خمس سنين! بس حظه السيء إنه ماكانش يعرف إن كان في كاميرات بتصور المكان اللي حصلت فيه الحادثه، وبعد ما اترفع الفيديو على السوشيال ميديا وتداولته الناس والصفحات، الداخلية قدرت إنها توصل له وتم القبض عليه واتحكم عليه بالسجن لمدة 10 سنين.

استغاثة إيفون نبيل بسبب تعرضها للتهديد والتعنيف من زوجها

حد ينقذني حقيقي حياتي بتنهار .. انا مش عارفه اتصرف أنقذوني
ده بلاغ لمن يهمه الامر

Posted by ‎ايفون نبيل – Evon Nabil‎ on Wednesday, September 8, 2021

وقتها نشرت البلوجر إيفون نبيل فيديو على صفحتها بتستغيث فيه من الانتهاكات اللي بتتعرض لها من جوزها على مدار الـ8 سنين، وإنها استحملت كتير بس لما الموضوع وصل معاها للحبس والتعنيف والتهديد، كان لازم تطلع علشان تحمي نفسها هي وأطفالها، وبعد ما الفيديو انتشر، الداخلية استجابت وأعلنت إنها هتاخد كل الإجراءات القانونية.

استعادة الطفل المخطوف بعد ما انتشر فيديو يوثق لحظات خطفه

من خلال كاميرات مراقبة على الطريق، اتسجل فيديو لاختطاف طفل من أمه على الطريق من خلال شخصين ملثمين بمشهد كان أشبه بفيلم سينمائي مرعب، وبعد ما الفيديو اتعمل وانتشر على السوشيال ميديا بيوم واحد، الداخلية أعلنت إنها وصلت للطفل!

أخر كلمة: ماتفوتوش قراءة: “انقذوا رشيد” حملة في مصر لإنقاذ حياة طفل بيهدده مرض نادر

تعليقات
Loading...
Tweet
Share
Share
Pin