لماذا تعتبر شوربة العدس هي البطلة في الشتاء عند العرب؟

كل ما الدنيا تسقع شوية والبرد يشد، نلاقي التايملاين كله مليان ميمز عن إن الأمهات كلهم بيعملوا شوربة عدس علشان البرد، ومن زمان العرب وخصوصًا المصريين معروفين إنهم بيدوا العدس أهمية على سفرتهم في فصل الشتاء، بأشكال كتير، من الشوربة للفتة بكل أشكالها، وبتعتبر هي الوجبة المفضلة للمصريين في البرد، لكن ليه شوربة العدس واخدة الشهرة دي كلها؟ هنفكر مع بعض في أسباب تخليها بطلة الشتاء.

عن: super mama

مش مكلفة

شوربة العدس مكوناتها يقدر أي حد يشتريها بسعر كويس ومناسب لمختلف الطبقات، وممكن نعمل كميات كبيرة منها بتكاليف بسيطة جدًا، ده بيخليها قريبة من كل الطبقات في المجتمع.

لإنها بتعتمد على العدس الأصفر وشوية خضار طازة حسب تفضيلاتك، ثمرة من كل نوع خضار كافية لعمل كمية كويسة من الشوربة تكفي أسرة كاملة، يعني مش هتكلفك كتير.

بتدي إحساس الدفا والشبع

شوربة العدس بتدي إحساس بالشبع لفترة، وكمان بتدفي الجسم وترفع درجة حرارته، علشان كده الناس بتفضّل تناولها في البرد علشان تدفيهم في السقيع اللي بنعيشه ده.

وفي ناس كتير بتعتمد عليها كمشروب أساسي في اليوم مش مرتبط بوجبة أساسية في اليوم، يعني ممكن تضيفها لقائمة مشروباتك الشتوية جنب السحلب والقهوة والحاجات اللي بتدفي.

مش بتاخد وقت في إعدادها

علشان مابنبقاش مستحملين الوقفة في المطبخ في البرد، وأصلًا مش بنستحمل الخروج من تحت البطانية حتى، بنبقى عايزين وصفات سريعة والشوربة دي مش بتاخد وقت كبير في تحضيرها، وده سبب مهم يخليها المفضّلة لينا في الأوقات دي، ونقدر نحضرها في وقت قليل قبل الأكل، مش محتاجين نحضر قبل الوجبة بساعات كتير.

قيمة غذائية

بقوليات وخضار، ببروتين وألياف طبيعية مفيدة للجسم بشكل كبير، في طبق واحد بيجمع عناصر غذائية مختلفة بتمد الجسم باحتياجاته، فتقدر بكمية شوربة قليلة تاخد حاجة جسمك من العناصر الغذائية المختلفة في وجبة واحدة.

سعرات حرارية قليلة

علشان كمان الشتاء بيحب الأكل وبنخرج منه وزننا زايد، ميزة شوربة العدس إنها بتحتوي على سعرات حرارية قليلة، فتقدر تاكل منها زيّ ما تحب من غير ما تترعب من كمية السعرات الحرارية فيها، مش زيّ الحلويات والسكريات مثلًا اللي مش بنبطل ناكلها في الشتاء.

لإنه بيتكون من خضار سعراته الحرارية قليلة، والعدس كميته مابتبقاش كتير، ومافيهوش كربوهيدرات تانية.

وصفاتها مختلفة

من أكتر من بلد، شوربة العدس وصفاتها متنوعة، من مصر والعراق وليبيا، وبنكهة لذيذة، تقدر تنوع في طبخها بأشكال مختلفة علشان ماتزهقش، وعلشان تقدّر اختلاف الأذواق بين كل شخص والتاني.

وكمان تقدر تشربها لوحدها، أو تضيفها لفتة مكونة من عيش محمص متقطع لقطع صغيرة وتقلية بصل خفيفة، وممكن تزود شوية سلطة خضراء تعلّي من قيمتها الغذائية وكمان تشبعك.

وهنا هتلاقي وصفات مختلفة ممكن تجربها حسب ذوقك.

وأنت صغير ممكن ماتكونش بتحب الشوربة دي، لكن دلوقتي بننصحك تدي لها فرصة تانية علشان ممكن يحصل لك زينا وتبقى من عشاقها دلوقتي، وممكن تجرب وصفات مختلفة لها وتغيّر وتضيف فيها لحد ما تلاقي حاجة على ذوقك وتعجبك، علشان لازم تستفيد بكل المميزات اللي فوق دي.

آخر كلمة: ماتفوتوش قراءة: مشروبات تبقى هي ملجأنا الوحيد في فصل الشتا

تعليقات
Loading...