في 27 سبتمبر: إيه المتاحف والقلاع المصرية اللي ماينفعش تفوت زيارتها

بمناسبة مرور 200 سنة على نشأة علم المصريات والاحتفال بيوم السياحة العالمي، المجلس الأعلى للآثار أعلن عن السماح بزيارة الأماكن السياحية والمتاحف والقلاع المصرية مجانًا يوم 27 سبتمبر. الأمين العام لغرفة شركات السياحة قال إن تم الموافقة على دخول المصريين والعرب والأفارقة والأجانب المقيمين كل المتاحف والمناطق الأثرية المفتوحة للزيارة التابعة للمجلس الأعلى للآثار مجانًا في اليوم ده، ما عدا مقابر توت عنخ آمون، نفرتاري، سيتي الأول، رمسيس السادس، وأهرامات الجيزة من الداخل.

بمناسبة القرار ده، حبينا نعمل قائمة بأهم وأحلى المتاحف والأماكن السياحية اللي ممكن تزورها في اليوم ده، في نظرية بتقول إننا نختار الأغلى، اللي في الأيام العادية ممكن يكون سعر تذكرتها مش مناسب لنا. وفي نظرية تانية بتقول إننا نستغل الفرصة ونزور المتاحف، لإن القلاع مش غنية في آثارها. لكن احنا هنتكلم عن أهم الأماكن اللي ممكن تعجبك وتحب تروحها في اليوم ده.

المتحف المصري في التحرير

عن: wikipedia
عن: travil

واحد من أهم وأشهر المتاحف، موجود في قلب القاهرة في وسط البلد. المتحف بيضم أكتر من 180 ألف قطعة أثرية، أهمها المجموعات الأثرية اللي تم العثور عليها في مقابر الملوك والحاشية الملكية للأسرة الوسطى في دهشور سنة 1894، ودلوقتي بيضم أعظم مجموعة أثرية في العالم بتعبر عن كل مراحل التاريخ المصري القديم.

لو أنت بتحب تتعرف على مراحل التاريخ المختلفة، وعايز تعرف أكتر عن الآثار المصرية القديمة، هيكون المتحف المصري هو وجهتك المفضلة. وكمان هيبقى اختيار كويس لو أنت مش بتحب تروح أماكن بعيدة ولا تعمل مغامرات بشكل كبير، لإن موقعه قريب من كل مكان في القاهرة، ومش بيتوّه نهائي، وفي وسط منطقة عمرانية، وتقدر كمان تتمشى بعد ما تخلص جولتك في المتحف، وتاخد لفة في شوارع وسط البلد.

المتحف القبطي

عن: etltravel

حوالي 20 ألف قطعة أثرية وفنية نادرة، من أناجيل وأيقونات ومخطوطات ونسيج وأخشاب، كل القطع دي بتعكس فترات تاريخية من القرن الرابع الميلادي، كلها موجودة في متحف الفن القبطي في مصر، وبيحتضن كل شواهد الوضع المسيحي في فترة العصر الروماني، اللي اتسمى بـ”عصر الشهداء” لإن المسيحيين تعرضوا للتنكيل والتعذيب وقتها، لحد ما اعترفت الإمبراطورية الرومانية بالديانة المسيحية.

عن: cairo.gov

المتحف موجود في منطقة مصر القديمة في القاهرة، تحديدًا في حصن بابليون اللي تم بنائه في العصر الروماني أثناء حكم الإمبراطور تراجان علشان يكون خط الدفاع الأول لبوابة مصر الشرقية، واللي يُعتبر واحد من أشهر الآثار الرومانية في مصر.

أول ما توصل، هتلاقي واجهة المتحف نموذج طبق الأصل من واجهة جامع الأقمر، مع إضافة بعض الرموز المسيحية. وده بيعكس رؤية الجذور المشتركة اللي بتجمع المصريين، حسب وجهة نظر الفنان التشكيلي، راغب عياد، صاحب فكرة واجهة المتحف.

المتحف وجهة مميزة لو حابب تتعرف أكتر على الآثار القبطية في مراحل تاريخية مختلفة، وكمان موقعه بيديلك مميزات زي إنك هتشوف حصن بابليون وتعرف أكتر عن تاريخه، والمكان نفسه مش بعيد، ده موجود في قلب القاهرة.

متحف الفن الإسلامي

عن: museumwnf
عن: lines-hub

متحف الفن الإسلامي في مصر موجود في القاهرة في حي باب الخلق، وبيضم مجموعة من أكبر وأروع الآثار الإسلامية على مستوى العالم. بدأت فكرة تجميع وعرض التحف الإسلامية سنة 1880م، وبعدها تم تأسيس مبنى المتحف وتم افتتاحه في سنة 1903م في عهد الخديوي عباس حلمي التاني، وتم تصميم واجهته على طراز واجهات العمارة المملوكية. هتقدر تشوف فيه لمحات من العصر الإسلامي وقطع أثرية شاهدة عليه.

المتحف بيتكون من دورين، وبيضم المتحف مجموعة كبيرة من القطع من مختلف أنحاء العالم الإسلامي. وده بيسمح للزائر بالتجول في كل فترات التاريخ الإسلامي، بالذات إن موضوعاتها مختلفة من فلك وطب وعمارة وغيرها. وكمان بتتنوع مواد صنع القطع دي؛ أعمال خشبية منحوتة بدقة، وقطع خزفية مزينة بإتقان، ومخطوطات نادرة. ومن أهم كنوز المتحف هو مفتاح الكعبة من العصر المملوكي، وقطعة نسيج بتحمل أقدم كتابة كوفية.

المتحف بيقفل أبوابه الساعة 5 مساءَا، علشان كده هتكون جولة صباحية لطيفة لو نزلت من بدري تزور المتحف.

قلعة صلاح الدين

ممكن يكون فكرة الكلام عن القلعة تقليدي، بس فعلًا ماينفعش نفوّت الكلام عن تفاصيل زيارتها، علشان أنت كمان ماتفوتش زيارتها.

قلعة صلاح الدين من أهم معالم القاهرة، وواحدة من أعرق القلاع الحربية اللي تم تشييدها في العصور الوسطى، بموقع استراتيجي أعلى جبل المقطم، بإطلالة تخطف العين على كل معالم القاهرة التاريخية. القلعة شهدت أحداث تاريخية كتير من العصر الأيوبي لحد نهاية أسرة محمد علي.

لما تزور القلعة، هتزور فيها عدد من المنشآت كمان، اللي اتعملت على مر العصور؛ ومن أهمها جامع محمد علي، جامع الناصر محمد بن قلاوون، جامع سليمان باشا الخادم،وكمان عدد من المتاحف منها متحف قصر الجوهرة، متحف الشرطة، والمتحف الحربي. 

عن: annahar

كل مكان فيهم له تاريخ وقصص، هتعرف عنها أكتر بزيارته. والممتع إن القلعة تقدر تزورها من 9 الصبح لـ 4:30 العصر. وتاخد جولة فيها وتشوف معالم القاهرة منها في عز النهار.

متحف المجوهرات الملكية

عن: etl travel

في الإسكندرية، متحف بيضم مجموعة كنوز من أجمل ما يكون. متحف المجوهرات الملكية ممكن يكون مش بنفس شهرة متاحف تانية في مصر، علشان كده حابين نتكلم عنه بالتفصيل، لإن زيارته فعلًا ممتعة. هتشوف فيه مقتنيات أسرة محمد علي اللي حكمت مصر أكتر من 150 سنة، وبيمتلكوا مجوهرات من أندر وأغلى ما يكون.

عن: alittihad

المتحف موجود في منطقة زيزينيا، ومن أول ما تدخله هتنبهر بذوق اللوحات والأسقف المذهبة، اللي اختاروها أميرات أسرة محمد علي اللي انشأوا القصر، وهما زينب فهمي وبنتها الأميرة فاطمة حفيدة محمد علي. وممكن تروح القصر اللي فيه المتحف، والقصر بيتكون من جناح شرقي وجناح غربي، بيربط بينهم ممر، وكل جناح منهم بيتكوّن من دورين وبدروم.

عن: cairo24

مواعيد المتحف من 9 الصبح لـ 5 مساءًا برضه، علشان كده زيارته هتحتاج منك تمشية صباحية، لكن في يوم 27 سبتمبر هنكون في أجواء خريفية لطيفة يستحب فيها جولات في النهار.

قصر البارون

مؤخرًا تم ترميمه وافتتاحه، والصور نفسها تشجعك تزوره وتعرف أكتر عن القصص الكتير اللي منتشرة عن القصر ده، وتتخيل أحداثها وأنت بتلف في كل ركن فيه، وتتخيل كمان شكله قبل التجديد كان ازاي.

قصر البارون يُعتبر من أهم وأجمل القصور الأثرية في مصر، لكن بعد وفاة صاحبه البارون إدوارد إمبان، القصر بقى مهجور ومُهمل لسنين طويلة، وأتحول لمنبع قصص وأساطير مرعبة لكن كلها مجرد أساطير. وبعد كده قررت الحكومة المصرية تجديده وتطويره، علشان يتحوّل لمكان أثري نستمتع بزيارته ونشوف الجمال المعماري المميز ده.

عن: wikipedia

التصميم الداخلي للقصر عبارة عن بدروم ودورين وسطح، والقصر بتحيط بيه حديقة كبيرة من كل الجهات، والقصر بيفتح أبوابه من 9 الصبح لـ 3 العصر، وموجود في قلب منطقة مصر الجديدة.

قصر عابدين

عن: ootlah

واحد من أهم وأكبر القصور الملكية في مصر وشهد على فترات زمنية كتير ومختلفة. كان مقر لحكم مصر من سنة 1874م لحد قيام ثورة يوليو 1952م واتحول من قصر ملكي لقصر رئاسي، وشهد في المرحلة دي كمان على أحداث ضخمة ومهمة في تاريخ مصر.

الأحداث دي زيّ حفل افتتاح قناة السويس، والمواجهة الشهيرة بين أحمد عرابي والخديوي في 1881م، وتحول مصر من الملكية إلى الجمهورية سنة 1952م، وكمان الرئيس عبد الناصر خطب من شرفة القصر أكتر من مرة لحد سنة 1958 لما اتجه ناصر إلى قصر القبة ليحكم منه. 

الزيارة لقصر عابدين مش بتعتبر زيارة لمتحف واحد، لإن القصر بيحتوي على 4 متاحف:

  • متحف الأسلحة: وده واحد من أكبر المتاحف الثرية بالآثار، اهتم بيه أبناء وأحفاد الخديوي إسماعيل، وحافظوا عليه، وبينقسم لقسمين، قسم الأسلحة البيضاء، وقسم الأسلحة النارية.
  • متحف الأوسمة والنياشين: وبينقسم لقسمين؛ المقتنيات الملكية والأوسمة والنياشين، وبيضم مجموعة من أندر الأوسمة والمتقنيات المملوكة لحكام مصر وعائلاتهم طول الفترة دي. واللي كانت بيتم إهدائها لكل شخص بيقدم خدمات كبيرة ومنفعة عامة للبلاد ويتم تكريمه.
  • متحف الفضيات: وده مخصص للحفاظ على مقتنيات الأسرة المالكة المصنوعة من الذهب والفضة والكريستال والبلور الملون، وهي عبارة عن أدوات وأواني وتحف بتستخدم في تناول الأطعمة والمشروبات، بالإضافة للهدايا القيمة اللي كانت بتُقدم من الوفود الأجنبية والطبقات العليا.
  • متحف الوثائق التاريخية: أحـدث الـمـتـاحـف اللي تم افتتاحها داخل القـصـر، وتم افـتـتاحـه في 2004، وبيحتوي على وثائق تاريخية مهمة من عهد محمد علي باشا لحد الملك فاروق الأول آخر ملوك مصر.

القصر مفتوح يوميًا للزيارة من الساعة 9 الصبح لحد 5 مساءًا.

معبد الدير البحري

عن: wikimedia

شوفت الأغنية المشهورة للي راح ديت مع حتشبسوت من فرقة رضا؟ مش دي الفكرة الوحيدة عن معبد الدير البحري اللي فيه المعبد الجنائزي للملكة حتشبسوت. لكن أكيد فيلم “غرام في الكرنك” أظهر لنا جزء من جمال المكان.

الملكة حتشبسوت قامت ببناء معبد في قمة الجمال في الدير البحري على الضفة الغربية في الأقصر، مواجه لمعبد الكرنك اللي في الضفة الشرقية. معبد الدير البحري بيتكون من 3 مستويات، كل مستوى فيه صف من الأعمدة، في نهايته فناء مفتوح بتتقدمه تماثيل لحتشبسوت على هيئة أوزيريس إله الموتى.

المعبد تم بنائه في 15 سنة، وعمره حوالي 3500 سنة.

في زيارة المعبد، هتعرف أكتر عن تاريخ أسرة الملكة اللي لقبت بـ”فرعون” وتاريخ أسرتها، وليه موجود تماثيل لها في هيئة أوزيريس إله الموتى، وكمان عن أسرار كتير عن الحضارة المصرية القديمة هيتم روايتها بطريقة جذابة من مرشدين سياحيين متخصيين في ده. ولو أنت من المهتمين بتاريخ وحضارة مصر القديمة، دي هتكون زيارة ممتعة ليك.

متحف النوبة

عن: amwagtours

تحفة معمارية ممكن يبقى لسه مش واخد الشهرة اللي يستحقها، تم افتتاحه في 1997، في منطقة أثرية من أجمل المناطق في أسوان، على طراز معماري نوبي استوحاه المصممين من المقابر الفرعونية، وحصل المتحف على جائزة أغاخان لأجمل مبنى معماري في العالم سنة 2001.

ظهرت فكرة إنشاء المتحف أثناء الحملة الدولية لإنقاذ آثار النوبة اللي اتبنتها منظمة اليونسكو، والمتحف بيتكون من 3 أدوار وبيحتوي على 5 آلاف قطعة أثرية بتمثل مراحل تطور الحضارة والتراث النوبي، أشهر القطع دي هي هيكل عظمي لإنسان عمره 23 ألف سنة، تم العثور عليه سنة 1982 في منطقة وادي الكوباينة في غرب أسوان.

العرض الخارجي للمتحف بيضم 86 قطعة فريدة من التماثيل الكبيرة واللوحات الأثرية بأحجام مختلفة، ده غير إن المتحف فيه عرض أثري لتاريخ النوبة على مر العصور المختلفة، وماكيتات للحياة اليومية في بلاد النوبة القديمة. علشان كده زيارة المتحف في شهر سبتمبر اللي يُعتبر طقسه لطيف، هيكون رحلة ممتعة ليك هتتعرف فيها على ثقافة مختلفة.

معبد خنوم

في مدينة إسنا في الأقصر، معبد خنوم هو الوحيد المتبقي في منطقة إسنا، وبيرجع اكتشافه لسنة 1843م، يعني في أواخر عصر محمد علي باشا. العالم الفرنسي المعروف شامبليون زار المعبد وقال إنه شاف نقوش بتحمل اسم الملك تحتمس المعبد ده.

المعبد عبارة عن صالة بشكل مستطيل، وواجهة بطراز معماري خاص بعمارة المعابد المصرية القديمة في العصر اليوناني والروماني. والأسقف بتحمل 24 أسطوانة بارتفاع 13 متر ومزخرفة بنقوش بارزة.

عن: youm7

طب إيه هو “خنوم” اللي المعبد متسمي على اسمه؟ خنوم أو غنوم Xnum، في الدين المصري القديم هو إله كان بيصور على شكل كبش، أو راجل له رأس كبش وله قرنين، واحتمال اشتق اسم الغنم منه. وطبقًا للمعتقد المصري القديم، قام خنوم بعملية الخلق المادي للإنسان من طمي النيل على عجلة الفخار. وبعض الروايات بتقول إنه كان بيشكّل الأطفال الصغيرين من طمي النيل المتوفر عند أسوان وبيحطهم في أرحام أمهاتهم.

أخر كلمة: ماتفوتوش قراءة: اكتشاف مقبرة أحد سياسيين رمسيس التاني وربما مومياء نفرتيتي

تعليقات
Loading...
Tweet
Share
Share
Pin