السينما والدراما العربية غنية بشكل ماتتخيلوش، لو قعدنا نتفرج وندوّر طول عمرنا مش هنلم برضه بكل المسلسلات والأفلام العربية وخصوصًا المصرية وتفاصيلها، ممكن ده يكون سبب إننا عدى علينا مشاهد غريبة الأطوار ماتفهمش تعدي على المشاهدين ازاي، لكن الكنوز دي بتظهر مع الوقت واحدة واحدة وبتنتشر بفضل السوشيال ميديا، والناس بتحب تشاركهم مع بعض، حبينا نجمع شوية من الكنوز دي ونحاول نفسر أسبابهم وازاي مرت مرور الكرام كده وقت عرضها؟
أزمة الكابتشينو
الموضوع اتفتح اليومين دول من هنا، المشهد ده كان نقطة البداية وشعاع النور اللي خلّانا نلقي اهتمام على الكنوز دي، المشهد منتشر دلوقتي على السوشيال ميديا والناس بتحاول بكل الطرق تفسر الماورائيات اللي اتقالت فيه، هل الفنان أحمد عبدالعزيز كان فاكر إن الكابتشينو ده وقتها أحدث صيحات البريل مثلًا ومتبري منه للدرجة دي؟ هل كان عامل حسابه في القعدة دي على 2 شاي وحس إن في مؤامرة والشيك هيعدي نص مرتبه فعمل الشويتين دول؟ وهل رد فعل الفنانة روجينا كان في نفس المشهد ولا دي غلطة مونتاج مثلًا؟ أصل مستحيل ده يكون رد الفعل على واحد بيقول لها لو شربتي كابتشينو هكلم أبوكي أقوله، وقبل ما أكلمه هرقعلك سداغك.
كورس إنجليزي عند شبيح اللغة
المفروض ان الاستاذه نهال عنبر بتتكلم انجليزي
المفروض ان الاستاذه نهال عنبر بتتكلم انجليزي… ?♂️
Posted by كراكيب on Saturday, March 28, 2020
المشهد ده شباك على فترة زمنية بيقول لنا فيها إن أسعار كورسات الإنجليزي كانت في السما، وده السبب الوحيد اللي بيفسر اللغة اللي كانت بتتكلم بيها الفنانة نهال عنبر وطريقة نطقها، اللغة دي ماتخرجش غير من شخص بيعمل إعلانات الكورس بتاعه على حيطان محطات الأتوبيس بألوان مزركشة ومدي لنفسه لقب شبيح اللغة. أو إن الفنانة كانت لسة جاية طازة من مطار بريطانيا البلد. فاحنا دلوقتي نفسنا احنا اللي نكلم زا بوليس علشان يتصرف.
جاي تتقدم لبنتي بمليون جنيه يا فقير؟
زي ما سمعت كده بالظبط، ده مشهد درامي حقيقي مش مشهد كوميدي ولا سف، الفنان أحمد الشقنقيري كان رايح بكل ثقة يتقدم لبنت الفنان أحمد خليل، وفاكر نفسه جامد وغني وعنده بيزنس راس ماله مليون جنيه. وده في الحقبة الزمية اللي باينة من لبسهم كان رقم مابنسمعوش غير في الأفلام أو في نشرة الساعة 9 فقرة الاقتصاد، لكن الفنان أحمد خليل اتخض من الرقم وهزأ الراجل الفقير اللي جاي يتقدم وهو ماحيلتوش إلا مليون جنيه، بجاحة يا أخي فعلًا.
شغل عصابات
الحقيقة فكرنا كتير، وأخدنا آراء ناس كتير، لكن مش عارفين نوصل لتفسير واحد حتى للمشهد ده، واضح إنه شغل عصابات كبيرة وكده لدرجة إننا مش فاهمينه، واللي مش فاهمينه أكتر هو ازاي المشهد ده عدى عادي كده وقت عرض الفيلم؟
أنا مش بني آدم أنا مهندس
الخناقة الجديدة بتاعت المهندسين طلع لها جذور، لقينا كنز من فيلم آسف على الإزعاج بيثبت الخناقة دي، وإن مهندسين كتير عندهم أزمة وجودية لإنهم أصعب كلية في مصر.
طفولة متأخرة
لو سمعت المشهد وأنت معدي كده من غير ما تبص عليه مش هتحس إن في حاجة غلط عادي، بس لو بصيت وشوفت شكل وسن الولد اللي بيتوجه له الكلام، دماغك هتلف، دادة إيه اللي تحمي الشحط ده؟ هل في السبعينات كان عادي الدادة تحمي الناس لحد ما يوصلوا سن الرشد مثلًا؟
تنكر ليفل 101
أساليب التنكر بتتطور على مر العصور في الأعمال الفنية، سواء عالميًا أو في الاعمال الفنية المصرية كمان، لكن المشهد ده يعتبر الأقوى في تاريخ التنكر في الدراما العربية والعالمية، سيبك بقى من الفلوس اللي بتتدفع على ماكيير ولبس وحركات، اتعلموا من المشهد. لكن المنافسة شرسة بين الفنان أحمد عبدالعزيز والفنان محمد وفيق، هنسيبلكم الاختيار.
إنهار مفيش وقت للتفسير
بس ده مش هنعتبره من أغرب المشاهد اللي مش فاهمينها بالعكس، هنعتبره حد عبر عننا من زمان. عارف الناس لما بتقعد تصيح على السوشيال ميديا ويقولوا عايزين ينهاروا بس مافيش وقت؟ قوم في نص الشغل ارقع بالصوت وبعدين كمل تاني عادي، أشرف عبدالباقي عملها قبلنا.
أقوى مشاهد الأكشن
عندنا نجوم كتير شالوا الأكشن على كتفهم من قديم الأزل، من فريد شوقي لأحمد السقا، ونبيلة عبيد دخلت المنافسة هي والفنان يوسف شعبان بس على الخفيف كده. بس ده مشهد احنا مش لاقيين له مبرر، حد عنده تفسير؟
مشاهد الأكشن مش محصورة في القضايا والأكشن المهم اللي له قصة، او اللي بيغير من المجتمع ويغير قوانين، لا في نوع جديد اخترعته الفنانة نبيلة عبيد، هربت بغطس في البسين والفنان ماعرفش ينشن عليها.
تطور الأفلام في السينما العربية وكمان المسلسلات شهد طفرة كبيرة، أكتر من 100 سنة، أكيد الـ 100 سنة دول فيهم أفلام تتصنف الأفضل في العالم، وفيهم الثغرات الغريبة المضحكة اللي لاقيناها دي.